ലഖ്നോ: ബി.ജെ.പി നേതാവ് ബലാത്സംഗത്തിനിരയാക്കിയെന്നും നിരന്തരം ഭീഷണിപ്പെടുത്തിയെന്നും ആരോപിച്ചെത്തിയ ദലിത് യുവതി വാര്ത്താസമ്മേളനത്തിനിടെ തലമുണ്ഡനം ചെയ്ത് പ്രതിഷേധിച്ചു. ബലാത്സംഗം ചെയ്യുകയും തന്റെ അശ്ലീലചിത്രങ്ങള് പകര്ത്തിയ ശേഷം അത് പുറത്തുവിടുമെന്ന് ഭീഷണിപ്പെടുത്തി നിരന്തരം പീഡിപ്പിച്ചതായും യുവതി പറഞ്ഞു. ഉത്തര്പ്രദേശിലെ ബി.ജെ.പി നേതാവായ സതീഷ് ശര്മ്മ മൂന്നു വര്ഷത്തോളം തന്നെ ശാരീരികമായും മാനസികമായും പീഡിപ്പിച്ചുവെന്നാണ് യുവതിയുടെ ആരോപണം.
പീഡനത്തെ ചെറുത്തതിന് തന്റെ മുടി വെട്ടിക്കളഞ്ഞുവെന്നും കുടുംബത്തെ ഇല്ലാതാക്കുമെന്ന് ഭീഷണിപ്പെടുത്തിയെന്നും യുവതി ആരോപിച്ചു. അവാധ് ബാര് അസോസിയേഷനില് പരാതി നല്കിയെങ്കിലും നടപടിയുണ്ടായില്ല. പൊലീസില് പരാതിപ്പെട്ട ശേഷം തന്റെ കുടുംബത്തിന് വധഭീഷണിയുണ്ടായി. പണം നല്കി കേസ് ഒതുക്കാനും ശ്രമം നടന്നു. താന് ദലിത് ആയതുകൊണ്ടാണ് അധികൃതരില് നിന്നും നീതി ലഭിക്കാത്തതെന്നും അവര് ആരോപിച്ചു.വാര്ത്താസമ്മേളനത്തില് തനിക്ക് നീതി ലഭിക്കണമെന്ന് പറഞ്ഞുകൊണ്ട് അവര് തലമുണ്ഡനം ചെയ്യുകയായിരുന്നു.
നീതി ലഭിച്ചില്ലെങ്കില് ആത്മഹത്യ ചെയ്യുമെന്നും ലഖ്നോ സ്വദേശിയും അഭിഭാഷകയുമായ യുവതി പറഞ്ഞു. നേതാവിനെതിരെ പരാതിയുമായി പൊലീസ് സ്റ്റേഷനിലെത്തിയെങ്കിലും കേസെടുക്കാന് അധികൃതര് തയറായില്ല. പ്രതിഷേധത്തെ തുടര്ന്ന് സതീഷ് ശര്മ്മക്കെതിരെ കേസെടുത്തെങ്കിലും തുടര്നടപടികളുണ്ടായില്ല. ശര്മ്മക്കെതിരെ നടപടിയെടുത്തില്ലെങ്കില് ആത്മഹത്യ ചെയ്യുമെന്നും അവര് വ്യക്തമാക്കി. ഉത്തര്പ്രദേശിലെ ഉന്നാവോയില് പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച ബി.ജെ.പി എം.എല്.എ കുല്ദീപ് സിങ് സെന്ഗാര് കഴിഞ്ഞമാസം അറസ്റ്റിലായിരുന്നു.
