ആരാധകർ ആവേശപൂർവം കാത്തിരിക്കുന്ന ലൂസിഫർ ഇന്ന് ലോകവ്യാപകമായി 3079 തിയേറ്ററുകളിൽ റിലീസ് ചെയ്യും. കേരളത്തിൽ 400 തിയേറ്ററുകളിലാണ് ലൂസിഫർ എത്തുന്നത്. രാവിലെ 7 മണിക്കാണ് ആദ്യ പ്രദർശനം.
പൃഥ്വിരാജ് സംവിധായകന്റെ കുപ്പായമണിയുന്ന ലൂസിഫറിലെ ഒരു നിർണായക രംഗത്ത് താരം പ്രത്യക്ഷപ്പെടുന്നുമുണ്ട്. സായേദ് മസൂദ് എന്നാണ് പൃഥ്വിരാജ് അവതരിപ്പിക്കുന്ന കഥാപാത്രത്തിന്റെ പേര്. ലൂസിഫറിൽ പൃഥ്വിരാജ് അഭിനയിക്കുന്ന വാർത്തയും കാരക്ടർ പോസ്റ്ററും പൃഥ്വിരാജ് തന്റെ ഒഫിഷ്യൽ ഫേസ് ബുക്ക് പേജിലൂടെ കഴിഞ്ഞ ദിവസമാണ് പുറത്തുവിട്ടത്.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ലൂസിഫറിന്റെ രചന നിർവഹിക്കുന്നത് മുരളിഗോപിയാണ്. ക്യാമറ: സുജിത് വാസുദേവ്. വിവേക് ഒബ്രോയ് , ടൊവിനോ തോമസ്, ഇന്ദ്രജിത്ത്, കലാഭവൻ ഷാജോൺ, ബൈജു സന്തോഷ്, ജോൺ വിജയ്, സുരേഷ്ചന്ദ്രമേനോൻ, മഞ്ജുവാര്യർ, തുടങ്ങിയവരും ലൂസിഫറിൽ അണിനിരക്കുന്നുണ്ട്.
