മോസ്കോ: റഷ്യന് തലസ്ഥാനമായ മോസ്കോയില് സുഖോയ് സൂപ്പര്ജെറ്റ് വിമാനത്തിന് തീപിടിച്ച് 41 മരണം.പ്രാദേശിക സമയം വൈകുന്നേരം 5:50 ഓടെയായിരുന്നു അപകടം. മോസ്കോയില് നിന്നും റഷ്യയുടെ വടക്ക് പടിഞ്ഞാറന് നഗരമായ മര്മാന്സ്കിലേക്ക് പോകുകയായിരുന്ന വിമാനമാണ് അപകടത്തില്പെട്ടത്. പറന്നുയര്ന്ന ഉടന് സിഗ്നല് തകരാറിനെത്തുടര്ന്ന് വിമാനം തിരിച്ചിറക്കിയെങ്കിലും തീ പിടിക്കുകയായിരുന്നു.
വിമാനത്തില് 78 യാത്രക്കാരും 5 ജീവനക്കാരുമാണ് ഉണ്ടായിരുന്നത്. യാത്രക്കാരെ സുരക്ഷിത സ്ഥലങ്ങളിലേക്ക് മാറ്റുന്നതിനിടെയാണ് അപകടം നടന്നത്. മരിച്ചവരില് വിമാനത്തിലെ ജീവനക്കാരും രണ്ട് കുട്ടികളും ഉള്പ്പെടുന്നു. പൊള്ളലേറ്റവരില് പലരുടെയും നില ഗുരുതരമായതിനാല് മരണസംഖ്യ ഇനിയും ഉയരാനാണ് സാധ്യത.
അപകടത്തിന്റെ കാരണം വ്യക്തമായിട്ടില്ല. ഇടമിന്നലേറ്റതാണ് അപകടകാരണമെന്ന് സ്ഥിരീകരിക്കാത്ത റിപ്പോര്ട്ടുകളുണ്ട്. സംഭവത്തില് റഷ്യന് സര്ക്കാര് അന്വേഷണം പ്രഖ്യാപിച്ചു. അപകടത്തില് റഷ്യന് പ്രസിഡന്റ് വള്ഡിമര് പുടിന് അനുശോചനം രേഖപ്പെടുത്തി. മരിച്ചവരുടെ കുടുംബങ്ങള്ക്ക് സര്ക്കാര് ധനസഹായംപ്രഖ്യാപിച്ചിട്ടുണ്ട്. പൊള്ളലേറ്റവരുടെ ചികിത്സ സര്ക്കാര് വഹിക്കുമെന്ന് പുടിന് അറിയിച്ചു.
