പൂനെ : വീണ്ടും കത്വാ മോഡല്‍ പീഡനം പൂനയിലും. ക്ഷേത്രത്തിനകത്ത് എട്ടു വയസ്സുകാരിയെ ക്രൂരമായി ബലാത്സംഗം ചെയ്തു. ക്ഷേത്രം ശുചീകരിക്കുന്ന സ്ത്രീയുടെ 18 വയസ്സുകാരനായ മകനാണ് കുട്ടിയെ അതിക്രൂരമായ ബലാത്സംഗത്തിന് ഇരയാക്കിയത്. പിംപ്രിയില്‍ ക്ഷേത്രത്തിനടുത്ത് കളിക്കുകയായിരുന്ന എട്ടു വയസ്സുകാരിയെ ക്ഷേത്രത്തിനുള്ളില്‍ കൊണ്ടു പോയി പീഡിപ്പിക്കുകയായിരുന്നു. ശനിയാഴ്ച രാവിലെ പിംപ്രി കരല്‍വാഡിയിലുണ്ടായ സംഭവത്തില്‍ ഒളിവിലായിരുന്ന പ്രതി രോഹന്‍ ബാലെകറെ ബുധനാഴ്ച പൊലീസ് അറസ്റ്റുചെയ്തു. മോര്‍വാഡി കോടതിയില്‍ ഹാജരാക്കിയ ഇയാളെ 18 വരെ പൊലീസ് കസ്റ്റഡിയില്‍ വിട്ടു.
അറസ്റ്റിലായ രോഹന്റെ അമ്മയാണ് ക്ഷേത്രത്തിലെ ശുചീകരണപ്രവൃത്തി ചെയ്യുന്നത്. സ്‌കൂള്‍പഠനം നിര്‍ത്തിയ പ്രതി അമ്മയുടെ സഹായിയായി നില്‍ക്കുകയായിരുന്നു. ആരുമില്ലാത്ത സമയം നോക്കി പെണ്‍കുട്ടിയെ ക്ഷേത്രത്തിനുള്ളില്‍ കൊണ്ടുപോയി പീഡിപ്പിക്കുകയായിരുന്നെന്ന് കേസന്വേഷിച്ച പിംപ്രി പൊലീസ് ഇന്‍സ്‌പെക്ടര്‍ ശ്രീധര്‍ ജാദവ് പറഞ്ഞു. ആശുപത്രിയില്‍ പ്രവേശിപ്പിച്ച കുട്ടി സുഖംപ്രാപിച്ചുവരുന്നു. പ്രതിക്കെതിരേ പോക്‌സോ നിയമം ഉള്‍പ്പെടെയുള്ള വകുപ്പുകള്‍ പ്രകാരം കേസെടുത്തിട്ടുണ്ടെന്നും പ്രതി കുറ്റം സമ്മതിച്ചതായും ജാദവ് പറഞ്ഞു. സംഭവത്തിനുശേഷം പ്രതി കുട്ടിയെ ക്ഷേത്രത്തില്‍ ഉപേക്ഷിച്ചുപോവുകയായിരുന്നു. അമ്മ ക്ഷേത്രത്തിലെത്തിയപ്പോള്‍ കുട്ടി നടന്ന സംഭവങ്ങള്‍ പറഞ്ഞു. പിന്നീട് ഇവര്‍ പിംപ്രി പൊലീസില്‍ പരാതി നല്‍കുകയായിരുന്നു.
