കൊച്ചി:സൗജന്യ യാത്രയും പുത്തന് യാത്രാ പാസുകളുമായി കൊച്ചി മെട്രോയുടെ ഒന്നാം വാര്ഷികാഘോഷം ജനകീയ ആഘോഷമാക്കാനൊരുങ്ങി കൊച്ചി മെട്രോ റെയില് ലിമിറ്റഡ് (കെഎംആര്എല്). കഴിഞ്ഞ ഒരുവര്ഷക്കാലം മെട്രോയ്ക്കൊപ്പം നിന്ന യാത്രക്കാര്ക്കും കൊച്ചിക്കും നന്ദിസൂചകമായി 19ന് സൗജന്യ യാത്രയാണ് കെഎംആര്എല് സമ്മാനമായി ഒരുക്കിയിരിക്കുന്നത്. ഒപ്പം യാത്രക്കാര് ഏറെ നാളായി പ്രതീക്ഷയോടെ കാത്തിരുന്ന യാത്രാ പാസുകളുടെ അവതരണവും വാര്ഷികാഘോഷത്തോടനുബന്ധിച്ചുണ്ടാകും. മെട്രോ ആരംഭിച്ചതു മുതലുള്ള യാത്രക്കാരുടെ ആവശ്യമായിരുന്ന സീസണ് ടിക്കറ്റും ദിവസ പാസ് സൗകര്യവും വാര്ഷികാഘോഷ ചടങ്ങില് അവതരിപ്പിക്കും.
സ്ഥിരം യാത്രക്കാരെ ലക്ഷ്യമിട്ടുള്ളതാണു സീസണ് ടിക്കറ്റ്. വിനോദ സഞ്ചാരികള്ക്കും മെട്രോ കാണാന് ആഗ്രഹിക്കുന്നവര്ക്കുമായാണു ദിവസപാസുകള് ഒരുക്കുന്നത്. പാസിന്റെ നിരക്ക് സംബന്ധിച്ച കാര്യങ്ങള് തീരുമാനിച്ചിട്ടില്ല. അതേസമയം, സാമ്പത്തിക സ്ഥിതി മെച്ചപ്പെടുന്നതുവരെ വിദ്യാര്ഥികള്ക്കു കണ്സഷന് നല്കുന്നത് ആലോചിക്കാനാകില്ലെന്നും അദ്ദേഹം പറഞ്ഞു. കൂടാതെ 2017 ജൂണ് 17നു പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത ശേഷം 19 മുതല് വാണിജ്യാടിസ്ഥാനത്തില് കൊച്ചി മെട്രോ ഓടിത്തുടങ്ങിയതിന്റെ സ്മരണയെന്നോണമാണ് ഫ്രീ റൈഡ് ഡേ എന്ന പേരില് സൗജന്യയാത്ര ഒരുക്കുന്നത്.
അന്നു പുലര്ച്ചെ ആറിനു സര്വീസ് ആരംഭിക്കുന്നതു മുതല് രാത്രി പത്തിനു സര്വീസ് അവസാനിക്കുന്നതുവരെ ആര്ക്കും മെട്രോയില് പരിധിയില്ലാതെ സൗജന്യമായി യാത്ര ചെയ്യാം. ഇതുവരെ മെട്രോയില് കയറിയിട്ടില്ലാത്തവര്ക്കു അതിനവസരമൊരുക്കുകയാണു ഇതുവഴി ഉദ്ദേശിക്കുന്നതെന്ന് വാര്ഷികാഘോഷ പരിപാടികള് വിശദീകരിക്കാന് കെഎംആര്എല് ആസ്ഥാനത്ത് വിളിച്ചുചേര്ത്ത വാര്ത്താസമ്മേളനത്തില് എംഡി എ.പി.എം. മുഹമ്മദ് ഹനീഷ് പറഞ്ഞു. മെട്രോ യാത്രക്കാര്ക്ക് ഉദ്ഘാടനവേദിയില് അവതരിപ്പിച്ച കൊച്ചി വണ് സ്മാര്ട്ട് കാര്ഡ് സൗജന്യമായി ലഭ്യമാക്കാനുള്ള അവസരവും വാര്ഷികത്തോടനുബന്ധിച്ച് ഏര്പ്പെടുത്തിയിട്ടുണ്ട്. ഈ മാസം 15 മുതല് 30 വരെ സ്മാര്ട്ട് കാര്ഡ് വാങ്ങുന്നവര്ക്ക് കാര്ഡിന്റെ വില നല്കേണ്ട. റീ ചാര്ജ് തുകയായ 12 രൂപ നല്കിയാല് കാര്ഡ് സ്വന്തമായി കിട്ടും. നിലവില് 237 രൂപയാണ് കാര്ഡിന് ഈടാക്കുന്നത്.
