റയല്‍ മാഡ്രിഡ് പരിശീലകസ്ഥാനം സിദാന്‍ രാജിവെച്ചു. ഈ സീസണ്‍ തുടക്കത്തില്‍ ല ലീഗെയില്‍ തിരിച്ചടി നേരിട്ടപ്പോള്‍ സിദാന്‍ രാജി വെക്കും എന്ന അഭ്യൂഹങ്ങള്‍ ഉണ്ടായിരുന്നെങ്കിലും ചാമ്പ്യന്‍സ് ലീഗിലെ പ്രകടനം സിദാന്റെ രക്ഷക്ക് എത്തി. പക്ഷെ റയല്‍ പ്രസിഡന്റ് ഫ്ലോറന്റിനോ പേരെസുമായുള്ള കൂടി കാഴ്ചക്ക് ശേഷം സിദാന്‍ രാജി പ്രഖ്യാപിക്കുകയായിരുന്നു.
കടുത്ത എതിരാളികള്‍ക്കെതിരെ വിജയം നേടി സിദാന്‍ ചാമ്പ്യന്‍സ് ലീഗ് നേടിയപ്പോള്‍ അദ്ദേഹം റയലില്‍ തുടരുമെന്നാണ് ആരാധകര്‍ പ്രതീക്ഷിച്ചത്. 2016 ഇല്‍ റാഫ ബെനീറ്റസിന്റെ പിന്‍ഗാമിയായി റയല്‍ പരിശീലക സ്ഥാനം ഏറ്റെടുത്ത സിദാന്‍ ചാമ്പ്യന്‍സ് ലീഗിന് പുറമെ സൂപ്പര്‍ കപ്പ്, ല ലീഗ, ക്ലബ്ബ് ലോകകപ്പ് കിരീടങ്ങളും റയലിനായി നേടിയിട്ടുണ്ട്.
