മുംബൈ: ആര്‍ട്ടിക്കിള്‍ 370, മുതാലാഖ് എന്നിവ തിരിച്ചു കൊണ്ടുവരാന്‍ തങ്ങളുടെ പ്രകടന പത്രികയില്‍ പ്രഖ്യാപിക്കാന്‍ ധൈര്യമുണ്ടോ എന്ന് നരേന്ദ്ര മോദി പ്രതിപക്ഷത്തെ വെല്ലുവിളിച്ചു. മഹാരാഷ്ട്രയിലെ ജല്‍ഗാവില്‍ നടത്തിയ തിരഞ്ഞെടുപ്പ് പ്രചാരണ റാലിയില്‍ സംസാരിക്കുകയായിരുന്നു അദേഹം.
ഭാരതത്തിലെ ജനങ്ങളുടെ ആഗ്രഹപ്രകാരമാണ് ഓഗസ്റ്റ് 5ന് കേന്ദ്രസര്‍ക്കാര്‍ ആ തീരുമാനം നടപ്പിലാക്കിയത്. ഈ ചരിത്ര നേട്ടത്തിനുമുമ്പ് ഭീകരത, വിഘടനവാദം, ഐക്യത്തിന്റെയും സമഗ്രതയുടെയും ആശയങ്ങള്‍ക്കെതിരായ ഗൂഢാലോചന എന്നിവയുടെ വിള നിലമായിരുന്നു കാശ്മീരിൽ.
ഞങ്ങളെ സംബന്ധിച്ചിടത്തോളം ജമ്മു കശ്മീര്‍, ലഡാക്ക് എന്നിവ ഒരു ഭൂപ്രദേശം മാത്രമല്ല, അവ ഇന്ത്യയുടെ കിരീടമാണ്. ആ പ്രദേശത്തെ ഓരോ ഭാഗവും ഇന്ത്യയുടെ ചിന്തയെയും ശക്തിയെയും സമ്പന്നമാക്കുന്നുവെന്നും മോദി റാലിയിൽ പറഞ്ഞു
