സോണിപ്പത്ത്: വാട്‌സ്‌ആപ്പിലെ ഫാമിലി ഗ്രൂപ്പില്‍ ചിത്രം പോസ്റ്റ് ചെയ്തതിന് യുവാവിനെ ബന്ധുക്കള്‍ തല്ലിക്കൊന്നു. ഹരിയാനയിലെ സോണിപ്പത്തിലാണ് സംഭവം. ലവ് (20) എന്ന യുവാവാണ് മരിച്ചത്. ലവിന്റെ സഹോദരന്‍ അജയുടെ ചിത്രങ്ങള്‍ വാട്‌സ്‌ആപ്പ് ഗ്രൂപ്പില്‍ പോസ്റ്റ് ചെയ്തിനെ തുടര്‍ന്നുണ്ടായ തര്‍ക്കമാണ് കൊലപാതകത്തില്‍ കലാശിച്ചത്.
ചിത്രങ്ങള്‍ കണ്ട ഗ്രൂപ്പ് അംഗം ദിനേഷ് എന്നയാള്‍ ലവിനെയും അജയേയും വീട്ടിലേക്ക് വിളിപ്പിച്ചു. തുടര്‍ന്ന് വീട്ടില്‍ വച്ച്‌ വാക്കുതര്‍ക്കമുണ്ടാകുകയും ഇരുമ്പ് വടിക്ക് ലവിനെയും അജയേയും അടിക്കുകയും ചെയ്തു. അത്താഴത്തിന് ശേഷം എടുത്ത ചില ചിത്രങ്ങള്‍ അറിയാതെ വാട്‌സ്‌ആപ്പ് ഗ്രൂപ്പില്‍ പങ്കുവയ്ക്കുകയായിരുന്നെന്ന് അജയ് പറഞ്ഞു. ലവ് സംഭവ സ്ഥലത്ത് വച്ച്‌ തന്നെ മരിച്ചു. അജയ് പരുക്കുകളോടെ ആശുപത്രിയിലാണ്.
