മുംബൈ: ദക്ഷിണ മുംബൈയിലെ ദോംഗ്രിയില്‍ നാലു നില കെട്ടിടം തകര്‍ന്നു വീണ് അമ്പതോളംപേര്‍ അവശിഷ്ടങ്ങള്‍ക്കിടയില്‍ കുടുങ്ങിക്കിടക്കുന്നു. മുംബൈയിലെ വലിയ ജനവാസ കേന്ദ്രങ്ങളില്‍ ഒന്നായ ദോംഗ്രിയില്‍ ഇന്ന് ഉച്ചയോടെയാണ് കെട്ടിടം തകര്‍ന്നുവീണത്.
ടാന്‍ഡല്‍ സ്ട്രീറ്റിലെ നാലു നിലകെട്ടിടമായ കേസാര്‍ബായ് ആണ് ഇടിഞ്ഞുവീണത്. കഴിഞ്ഞയാഴ്ച വരെ ശക്തമായ മഴയും വെള്ളപ്പൊക്കവും റിപ്പോര്‍ട്ട് ചെയ്യപ്പെട്ട മേഖലയായ ഇവിടെ സ്ഥിതി ചെയ്യുന്നതിലധികവും കാലപ്പഴക്കം ചെന്ന കെട്ടിടങ്ങളാണ്. ആംബുലന്‍സും ഫയര്‍ഫോഴ്സിന്റെ വാഹനങ്ങളും സ്ഥലത്തെത്തിയിട്ടുണ്ട്. രക്ഷാ പ്രവര്‍ത്തനം പുരോഗമിക്കുകയാണ്. ആളപായം സംബന്ധിച്ച റിപ്പോര്‍ട്ടുകള്‍ പുറത്തു വന്നിട്ടില്ല.
