തിരുവനന്തപുരം: ഇന്ധനവില വര്ധനവില് പ്രതിഷേധിച്ച് ഇന്ന് ആഹ്വാനം ചെയ്ത ഭാരത് ബന്ദില് നിന്ന് കേരളത്തിലെ പ്രളയബാധിത പ്രദേശങ്ങളെ ഒഴിവാക്കിയതായി കെപിസിസി പ്രസിഡന്റ് എം എം ഹസന്. ബന്ദ് ആചരിക്കുന്നത് ദുരിതാശ്വാസ പ്രവര്ത്തനങ്ങള്ക്ക് തടസമാകരുതെന്നും അദ്ദേഹം പറഞ്ഞു. നേരത്തെ ഭാരത് ബന്ദില് നിന്ന് കേരളത്തെ ഒഴിവാക്കാന് സാധിക്കില്ലെന്ന് എം എം ഹസ്സന് പറഞ്ഞിരുന്നു. രാവിലെ ആറ് മുതല് വൈകീട്ട് ആറ് വരെയാണ് ഹര്ത്താല്. പ്രളയബാധിത പ്രദേശങ്ങളെ ബന്ദില്നിന്ന് ഒഴിവാക്കുമെന്ന് കോണ്ഗ്രസ്സ് നേതൃത്വം നേരത്തെ അറിയിച്ചിരുന്നു. രാവിലെ ഒന്പതു മുതല് വൈകിട്ട് മൂന്നുവരെയാണ് എ.ഐ.സി.സി ആഹ്വാനം ചെയ്ത ഭാരത് ബന്ദ്.
എന്നാല് കേരളത്തില് ഇത് രാവിലെ ആറുമുതല് വൈകിട്ട് ആറുവരെ ഹര്ത്തലായി ആചരിക്കാനാണ് കെ.പി.സി.സിയുടേയും ഇടതുപാര്ട്ടികളുടേയും തീരുമാനം. പ്രളയബാധിത പ്രദേശങ്ങളിലെ സാധാരണജീവിതത്തിനും ദുരിതാശ്വാസ പ്രവര്ത്തനങ്ങള്ക്കും തടസമുണ്ടാക്കില്ലെന്നാണ് നേതാക്കള് പറയുന്നത്. പ്രളയാനന്തര പ്രവര്ത്തനത്തെ ബാധിക്കാതെ ഹര്ത്താല് നടത്തുമെന്ന് എല്ഡിഎഫും വ്യക്തമാക്കിയിരുന്നു. കേരളം പ്രളയക്കെടുതി നേരിടുന്ന പശ്ചാത്തലത്തില് ഹര്ത്താല് പ്രഖ്യാപിച്ചതിനെതിരെ കോണ്ഗ്രസിലെ ഒരു വിഭാഗത്തിന് അതൃപ്തിയുണ്ട്. കോണ്ഗ്രസ് വൈസ് പ്രസിഡന്റ് വി ഡി സതീശന് പരസ്യമായി എതിര്പ്പ് രേഖപ്പെടുത്തിയിരുന്നു. പ്രളയദുരന്തത്തിന് ശേഷം പുനരധിവാസപ്രവര്ത്തനങ്ങള് പുരോഗമിക്കുന്നതിനിടെയാണ് നാളെ ഹര്ത്താലില് സംസ്ഥാനം സ്തംഭിക്കുക. ഇക്കാര്യത്തില് എം.കെ.മുനീറും ചെറിയാന് ഫിലിപ്പും ഉള്പ്പെടെ പ്രമുഖര് ഉയര്ത്തിയ പ്രതിഷേധം ഇടതു വലതു മുന്നണികള് മുഖവിലക്കെടുത്തില്ല.
