ന്യൂഡല്ഹി: ഭാര്യമാരെ ഉപേക്ഷിച്ച് വിദേശത്തേക്ക് കടക്കുന്ന പ്രവാസികള്ക്ക് കേന്ദ്രസര്ക്കാരിന്റെ പിടിവീണു. എണ്പതോളം പരാതികളാണ് വിദേശകാര്യ മന്ത്രാലയത്തിന് കഴിഞ്ഞ രണ്ട് മാസത്തിനുള്ളില് ലഭിച്ചത്. പരാതികളുടെ ഗൗരവം കണക്കിലെടുത്താണ് ആദ്യഘട്ടത്തില് എട്ടുപേര്ക്കെതിരെ നടപടി സ്വീകരിച്ചിട്ടുള്ളത്.
ഇതില് അഞ്ചുപേരുടെ പാസ്പോര്ട്ടുകള് കഴിഞ്ഞമാസം തന്നെ വിദേശകാര്യ മന്ത്രാലയം റദ്ദാക്കിയിരുന്നു. കുടുംബ പ്രശ്നങ്ങളും കേസുകളും മറ്റുംകൊണ്ട് വിദേശത്തേക്ക് കടക്കുന്നവര്ക്കെതിരെയാണ് നടപടി സ്വീകരിക്കുന്നത്. ഈ രീതിയില് പ്രവര്ത്തിച്ച എട്ട് പ്രവാസികളുടെ പാസ്പോര്ട്ട് റദ്ദാക്കി.
ഇവര്ക്കെതിരെ ലുക്കൗട്ട് സര്ക്കുലര് പുറപ്പെടുവിച്ചിട്ടുണ്ടെന്ന് കേന്ദ്ര വനിതാ – ശിശു വികസന മന്ത്രാലയം മാധ്യമങ്ങളെ അറിയിച്ചു. ദേശീയ വനിതാ കമ്മീഷന് പരിശോധിക്കുന്ന പരാതികളില് വനിതാ – ശിശുവികസന മന്ത്രാലയ സെക്രട്ടറി നേതൃത്വം നല്കുന്ന സമിതിയാണ് പാസ്പോര്ട്ട് അസാധുവാക്കുന്ന നടപടികളെടുക്കുന്നത്.
