മൂവാറ്റുപുഴ: കന്യാസ്ത്രീയെ പിഡിപ്പിച്ച കേസില് പ്രതിയായ ബിഷപ്പ് ഫ്രാങ്കോ മുളക്കല് മൊഴി മാറ്റാന് സമ്മര്ദ്ദം ചെലുത്തുന്നതായി കേസിലെ സാക്ഷി ലിസി വടക്കേല് ആരോപിച്ചു. തനിക്ക് മാനസിക പ്രശ്നമുണ്ടെന്ന് വരുത്തി തീര്ക്കാനുള്ള നീക്കം നടത്തുന്നുവെന്നും മുഖ്യ സാക്ഷിയും കന്യാസ്ത്രീയുമായ അവർ ആരോപിച്ചു.
മൂവാറ്റുപുഴയിലെ കന്യാസ്ത്രീ മഠത്തില് പോലീസ് സുരക്ഷയിലാണ് നിലവില് ലിസി കഴിയുന്നത്. ഫോണിലൂടെയും നേരിട്ടും തനിക്ക് നിരന്തര സമ്മര്ദ്ദമുണ്ട്. മാനസിക രോഗിയാണെന്ന് വരുത്തിത്തീർക്കാനുള്ള ശ്രമങ്ങള് നടത്തി വരുന്നു. ഇതിലൂടെ താന് കള്ളമൊഴിയാണ് നല്കിയതെന്ന് വരുത്തി തീര്ക്കാനുള്ള ശ്രമങ്ങളാണ് നടത്തുന്നതെന്നും ലിസി ആരോപിച്ചു. കേസില് വിചാരണ നടപടികള് എത്രയും പെട്ടെന്ന് പൂര്ത്തിയാക്കണം. ബിഷപ്പ് ഫ്രാങ്കോ മുളക്കലിന് ശിക്ഷ ഉറപ്പാക്കണമെന്നും ലിസി ആവശ്യപ്പെട്ടു.
