തിരുവനന്തപുരം:'ഫോനി' ചുഴലിക്കാറ്റിന്റെ പ്രഭാവം മൂലം കേരളത്തില് വിവിധയിടങ്ങളില് ഇന്ന് ശക്തമായ മഴ ലഭിക്കാന് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
എറണാകുളം, മലപ്പുറം, വയനാട് എന്നി ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. മത്സ്യത്തൊഴിലാളികള് ഇന്നും കടലില് പോകാന് പാടില്ല.
ആഴക്കടലില് മത്സ്യബന്ധനത്തില് ഏര്പ്പെട്ടിരിക്കുന്നവര് ഏറ്റവും അടുത്തുള്ള സുരക്ഷിതമായ തീരത്തേക്ക് എത്തിച്ചേരണമെന്ന് ദുരന്ത നിവാരണ അതോറിട്ടി അറിയിച്ചു.
'ഫോനി'യുടെ സഞ്ചാര പഥത്തില് കേരളം ഇല്ലെങ്കിലും ചില ജില്ലകളില് ശക്തമായ കാറ്റും മഴയും ഉണ്ടായേക്കാം. മണിക്കൂറില് 40- 50 കിലോമീറ്റര് വരെയും ചില അവസരങ്ങളില് 60 കിലോമീറ്റര് വരെയും വേഗതയില് കാറ്റ് വീശാന് സാദ്ധ്യതയുണ്ട്.
കൂടുതല് ശക്തി പ്രാപിച്ച് തീവ്ര ചുഴലിക്കാറ്റായും തുടര്ന്നുള്ള 24 മണിക്കൂറില് അതിതീവ്ര ചുഴലിക്കാറ്റായും മാറുമെന്നാണ് കണക്കാക്കപ്പെടുന്നത്. മേയ് ഒന്നു വരെ വടക്ക് പടിഞ്ഞാറന് ദിശയില് സഞ്ചരിക്കുന്ന 'ഫോനി' അതിനുശേഷം വടക്ക് കിഴക്ക് ദിശയില് മാറി സഞ്ചരിക്കുമെന്നാണ് പ്രതീക്ഷിക്കുന്നത്.
