മുംബൈ: കോവിഡ് 19 വൈറസ് ബാധയുടെ പശ്ചാത്തലത്തില് ഐപിഎല് മത്സരങ്ങളുടെ ടിക്കറ്റിന് നിരോധനം ഏര്പ്പെടുത്താനൊരുങ്ങി മഹാരാഷ്ട്ര സര്ക്കാര്. കാണികള് വലിയ രീതിയില് ഒത്തുകൂടുന്നത് ഒഴിവാക്കാനാണ് സര്ക്കാര് ടിക്കറ്റ് നിരോധിക്കാന് ഒരുങ്ങുന്നതെന്ന് ദേശീയ മാദ്ധ്യമങ്ങള് റിപ്പോര്ട്ട് ചെയ്യുന്നു.
നേരത്തെ, മഹാരാഷ്ട്രയില് രണ്ട് പേര്ക്കു കൂടി കോവിഡ് 19 സ്ഥിരീകരിച്ചിരുന്നു. ഇതോടെ ആകെ പത്ത് പേര്ക്കാണ് മഹാരാഷ്ട്രയില് രോഗബാധ സ്ഥിരീകരിച്ചത്. നിലവില് അതീവ ജാഗ്രത നിര്ദ്ദേശം പുറപ്പെടുവിച്ച സാഹചര്യത്തിലാണ് ഐപിഎല് മത്സരങ്ങള്ക്ക് നിയന്ത്രണങ്ങള് ഏര്പ്പെടുത്താന് മഹാരാഷ്ട്ര സര്ക്കാര് തീരുമാനിച്ചിരിക്കുന്നത്.
