ബോളിവുഡ് സൂപ്പര്‍ത്താരം സല്‍മാന്‍ ഖാനെ വധിക്കാന്‍ രാജസ്ഥാനില്‍നിന്നുള്ള ഗുണ്ടാസംഘം പദ്ധതിയിട്ടിരുന്നതായുള്ള വെളിപ്പെടുത്തലിനെത്തുടര്‍ന്ന് സല്‍മാനുള്ള സുരക്ഷ പൊലീസ് ശക്തമാക്കി. അടുത്തിടെ ഹരിയാന പൊലീസിലെ പ്രത്യേക ദൗത്യസംഘം അറസ്റ്റ് ചെയ്ത ഗുണ്ടാനേതാവ് സമ്പത് നെഹ്‌റയാണ് സല്‍മാനെ വധിക്കാന്‍ പദ്ധതിയിട്ടിരുന്നതായി വെളിപ്പെടുത്തിയത്.
രാജസ്ഥാനിലെ കുപ്രസിദ്ധമായ ലോറന്‍സ് ബിഷ്‌ണോയ് ഗുണ്ടാസംഘത്തിലെ ഷാര്‍പ്പ് ഷൂട്ടറാണ് സമ്പത്. ഹൈദരാബാദില്‍നിന്നാണ് ഇയാളെ ഹരിയാന പ്രത്യേക ദൗത്യസേന കസ്റ്റഡിയിലെടുത്തത്. സല്‍മാനെ വധിക്കാന്‍ പദ്ധതിയിട്ടിരുന്നതായും ഏതാനും മാസമായി അതിന് ശ്രമിക്കുകയായിരുന്നുവെന്നും സമ്പത് പൊലീസിനോട് വെളിപ്പെടുത്തി.
