മലപ്പുറം: മലപ്പുറത്ത് ആള്‍ക്കൂട്ട മര്‍ദനത്തില്‍ മനംനൊന്ത് യുവാവ് ജീവനൊടുക്കിയ കേസില്‍ അക്രമ ഫോട്ടോകള്‍ ഷെയര്‍ചെയ്ത വാട്സ്‌ആപ്പ് ഗ്രൂപ്പിന്‍റെ അഡ്മിന്‍ അറസ്റ്റില്‍. യുവാവിനെ കെട്ടിയിട്ട് അക്രമിക്കുന്ന ഫോട്ടോകള്‍ ഷെയര്‍ ചെയ്ത ഗ്രൂപ്പിന്‍റെ അഡ്മിനായ കുറ്റിപ്പാല അബ്ദുള്‍ നാസറിനെയാണ് അറസ്റ്റ് ചെയ്തത്. കുറ്റിപ്പാല സ്വദേശി മുഹമ്മദ് സാജിദിനെയാണ് മോഷണക്കുറ്റം ചുമത്തി കഴുത്തിലും മറ്റും കയര്‍ കൊണ്ട് കെട്ടിയിട്ട് മര്‍ദിച്ച്‌ ദൃശ്യങ്ങള്‍ സോഷ്യല്‍ മീഡിയ വഴി പ്രചരിപ്പിച്ചത്.
ഇതില്‍ മനംനൊന്ത് കഴിഞ്ഞ 31-ന് യുവാവ് ആത്മഹത്യ ചെയ്തു. സാജിദിന്‍റെ ആത്മഹത്യാകുറിപ്പും പോലീസിന് ലഭിച്ചിരുന്നു. അറസ്റ്റിലായ അബ്ദുള്‍ നാസറിന്‍റെ സഹോദരന്‍ സഹീറാണ് സാജിദിനെ ആക്രമിക്കുന്ന ഫോട്ടോകള്‍ പകര്‍ത്തിയതും ഇവ സോഷ്യല്‍മീഡിയയില്‍ ആദ്യമായി ഷെയര്‍ ചെയ്തതെന്നുമാണു പോലീസിന്‍റെ പ്രാഥമിക നിഗമനം.
ഇയാളെ ഇതുവരെ പിടികൂടാനായിട്ടില്ല.
