ബെംഗളുരു: ആഭ്യന്തരകലഹം അതിന്റെ മൂര്ദ്ധന്യാവസ്ഥയിലെത്തിയതോടെ സര്ക്കാര് താഴെ വീഴാതിരിക്കാന് പൂഴിക്കടകന് പയറ്റുമായി കോണ്ഗ്രസ് – ജെഡിഎസ് നേതൃത്വം. രാജി വച്ച വിമത എംഎല്എമാര്ക്ക് മന്ത്രിപദവി നല്കാന് കര്ണാടകത്തില് മുഖ്യമന്ത്രിയൊഴികെ മറ്റെല്ലാ മന്ത്രിമാരും രാജി നല്കി. സ്വതന്ത്രനായ മന്ത്രി എച്ച് നാഗേഷ് രാജി വച്ച് ബിജെപിക്ക് പിന്തുണ പ്രഖ്യാപിച്ചതിന് തൊട്ടു പിന്നാലെയാണ് മന്ത്രിമാരുടെ കൂട്ട രാജി. കര്ണാടക സര്ക്കാര് താഴെ വീഴില്ലെന്ന് മുഖ്യമന്ത്രി എച്ച് ഡി കുമാരസ്വാമി പറഞ്ഞു. മന്ത്രിമാരെല്ലാം രാജി വച്ചെന്നും ഉടന് മന്ത്രിസഭാ പുനഃസംഘടനയുണ്ടാകുമെന്നും മുഖ്യമന്ത്രി കുമാരസ്വാമി ട്വീറ്റ് ചെയ്തു:
ആദ്യം രാജി പ്രഖ്യാപിച്ചത് കോണ്ഗ്രസ് മന്ത്രിമാരാണ്. 21 കോണ്ഗ്രസ് മന്ത്രിമാര് കൂട്ടത്തോടെ രാജി വച്ചു. പിന്നാലെ ജെഡിഎസ് മന്ത്രിമാരും രാജി പ്രഖ്യാപിച്ചു. വിമത കോണ്ഗ്രസ് എംഎല്എ രാമലിംഗ റെഡ്ഡിയുള്പ്പടെയുള്ളവരുമായി മുഖ്യമന്ത്രി തന്നെ നേരിട്ട് കൂടിക്കാഴ്ച നടത്തിയിരുന്നു. കൂടുതല് പേരെ ബിജെപി സ്വന്തം പാളയത്തിലേക്ക് വലിക്കാതിരിക്കാന് ജെഡിഎസ് എംഎല്എമാരെ കൂര്ഗിലെ പാഡിംഗ്ടണ് റിസോര്ട്ടിലേക്ക് മാറ്റാനൊരുങ്ങുകയാണ് നേതൃത്വമിപ്പോള്.
മുള്ബാഗല് എംഎല്എയായ എച്ച് നാഗേഷ് സര്ക്കാര് രൂപീകരണസമയത്ത് കോണ്ഗ്രസിനാണ് പിന്തുണ പ്രഖ്യാപിച്ചത്. പിന്നെ കഴിഞ്ഞ ഡിസംബറില് കളം മാറിച്ചവിട്ടി ബിജെപിക്കൊപ്പം പോവുകയാണെന്ന് പ്രഖ്യാപിച്ചു. അപ്പോള് ജെഡിഎസ് ഇടപെട്ട് അനുനയനീക്കത്തിലൂടെ മന്ത്രിസ്ഥാനം നല്കിയാണ് നാഗേഷിനെ ഒപ്പം പിടിച്ചു നിര്ത്തിയത്. രാജി വച്ചതിന് പിന്നാലെ നാഗേഷ് മുംബൈയിലേക്ക് പോയി. എട്ട് കോണ്ഗ്രസ് എംഎല്എമാരും മൂന്ന് ജെഡിഎസ് എംഎല്എമാരും മുംബൈയിലെ ഫൈവ് സ്റ്റാര് ഹോട്ടലിലാണ് തങ്ങുന്നത്.
ഈ രാജിക്കത്തുകളെല്ലാം അംഗീകരിക്കപ്പെട്ടാല് നിയമസഭയില് കേവലഭൂരിപക്ഷത്തിന് വേണ്ട അംഗങ്ങളുടെ എണ്ണം 106 ആകും. ജെഡിഎസ് – കോണ്ഗ്രസ് സഖ്യസര്ക്കാരിന്റെ അംഗബലം 104 ആയി ചുരുങ്ങും. ബിജെപിക്ക് നിലവില് 105 അംഗങ്ങളുണ്ട്. സ്വതന്ത്രന് എച്ച് നാഗേഷിന്റെ കൂടി പിന്തുണയോടെ ബിജെപിക്ക് കേവലഭൂരിപക്ഷം ഉറപ്പിക്കാം. 106.
മന്ത്രിമാരെല്ലാം രാജി വച്ച സ്ഥിതിക്ക് ഇനി വിമതര് എന്ത് നിലപാടെടുക്കുമെന്നതാണ് നിര്ണായകം. മന്ത്രിപദവി അംഗീകരിച്ച് സര്ക്കാരിനെ നിലനിര്ത്തുമോ അതോ, രാജിയിലുറച്ച് നിന്ന് സര്ക്കാരിനെ താഴെ വീഴ്ത്തുമോ എന്നത് കണ്ടറിയണം. നാളെയാണ് സ്പീക്കര് വിധാന് സൗധയില് തിരിച്ചെത്തുന്നത്. നാളെ രാവിലെ കോണ്ഗ്രസ് നിയമസഭാ കക്ഷിയോഗം വിളിച്ചിട്ടുണ്ട്. പങ്കെടുക്കാത്തവര്ക്കെതിരെ കര്ശന നടപടിയുണ്ടാകുമെന്ന് മുന്നറിയിപ്പും നല്കിയിട്ടുണ്ട്. നാലോ അഞ്ചോ എംഎല്എമാരെ ഒപ്പമെത്തിച്ചാല് കേവലഭൂരിപക്ഷം തികയ്ക്കാമെന്ന പ്രതീക്ഷയിലാണ് സഖ്യസര്ക്കാര്.
