ന്യൂഡൽഹി: ലോക്സഭാ തിരഞ്ഞെടുപ്പിൽ വയനാട്ടിൽ രാഹുൽഗാന്ധി മത്സരിക്കുമെന്ന് പ്രഖ്യാപിച്ചതിന് പിന്നാലെ വടകരയിൽ കെ.മുരളീധരന്റെ സ്ഥാനാർത്ഥിത്വവും കോൺഗ്രസ് ദേശീയ നേതൃത്വം ഔദ്യോഗികമായി പ്രഖ്യാപിച്ചു.വടകരയിൽ കെ.മുരളീധരൻ യുഡിഎഫ് സ്ഥാനാർത്ഥിയാകുമെന്ന് കോൺഗ്രസ് പ്രഖ്യാപിച്ചു.
നിലവിൽ തലസ്ഥാനത്തെ വട്ടിയൂർക്കാവ് മണ്ഡലത്തെ പ്രതിനിധീകരിക്കുന്ന എം.എൽ.എയാണ് കെ.മുരളീധരൻ. സിപിഎമ്മിന്റെ പി.ജയരാജനാണ് വടകരയിലെ എൽ.ഡി.എഫ് സ്ഥാനാർത്ഥി. വി.കെ. സജീവനാണ് എൻഡിഎയ്ക്ക് വേണ്ടി രംഗത്തുള്ളത്. കെ.മുരളീധരൻ ഇന്ന് പത്രിക സമർപ്പിക്കും.
നീണ്ട കാത്തിരിപ്പിനൊടുവിലാണ് രാഹുൽ ഗാന്ധി വയനാട്ടിൽ മത്സരിക്കുമെന്ന് മുതിർന്ന നേതാവ് എ.കെ.ആന്റണി പ്രഖ്യാപിച്ചത്. ഉത്തര്പ്രദേശിലെ അമേഠിക്ക് പുറമേയാണ് രാഹുൽ ഗാന്ധി വയനാട്ടിൽ നിന്ന് മത്സരിക്കുക. മൂന്ന് സംസ്ഥാനങ്ങളുടെ സംഗമസ്ഥാനമായ വയനാട്ടിൽ രാഹുൽ മത്സരിക്കുന്നത് ദക്ഷിണേന്ത്യയിലാകെ ഗുണം ചെയ്യുമെന്ന് കോൺഗ്രസ് നേതൃത്വം വിശദീകരിച്ചു.
