ശ്രീനഗര്: ജമ്മു കശ്മീരിലെ ഷോപ്പിയാനില് നിന്ന് കഴിഞ്ഞ ദിവസം ഭീകരര് തട്ടിക്കൊണ്ടു പോയ പൊലീസ് കോണ്സ്റ്റബിളിനെ വെടിയേറ്റ് മരിച്ച നിലയില് കണ്ടെത്തി. ഇന്നലെയാണ് ഭീകര സംഘം ജാവേദ് അഹമ്മദ് ദര് എന്ന കോണ്സ്റ്റബിളിനെ തട്ടിക്കൊണ്ടു പോയത്. ഷോപ്പിയാനിലെ കുല്ഗാമില് നിന്ന് ഇന്ന് രാവിലെയാണ് ജാവേദിന്റെ ശരീരം കണ്ടെത്തിയത്. ജാവേദിനായുള്ള തിരച്ചില് നടത്തി വരികയായിരുന്നു.
നാല് പേരടങ്ങിയ സംഘമാണ് ഇദ്ദേഹത്തെ തട്ടിക്കൊണ്ടു പോയത്. മുന് ഷോപ്പിയാന് എസ്എസ്പി ശൈലേന്ദ്ര കുമാറിന്റെ പേഴ്സണല് സെക്യൂരിറ്റി ഓഫീസറാണ് ജാവേദ്. ഷോപ്പിയാനിലെ ഒരു മെഡിക്കല് സ്റ്റോറില് നില്ക്കുകയായിരുന്ന ഇദ്ദേഹത്തെ കാറിലെത്തിയ ഒരു സംഘം പിടിച്ചു കൊണ്ടു പോവുകയായിരുന്നു. ഹിസ്ബുള് ഭീകരരാണ് സംഭവത്തിനു പിന്നിലെന്ന് സംശയിക്കുന്നതായി പൊലീസ് പറഞ്ഞു.
