ഭര്‍ത്താവിന് മറ്റാരോടെങ്കിലും ബന്ധമുള്ളതായി സംശയിക്കുന്ന ഭാര്യമാര്‍ക്ക് അത് വളരെ എളുപ്പത്തില്‍ കണ്ടെത്തുന്നതിനുള്ള സൂത്രമാണ് മനശാസ്ത്രജ്ഞ ഡോ. ആമി ഇവേഴ്സണ്‍ കണ്ടെത്തിയിരിക്കുന്നത്. എത്ര ആത്മാര്‍ഥമായാണ് പങ്കാളികള്‍ പരസ്പരം സ്നേഹിക്കുന്നതെങ്കിലും ചിലപ്പോഴൊക്കെ ആര്‍ക്കെങ്കിലുമൊരു ചാഞ്ചല്യമുണ്ടായേക്കാമെന്നും അവര്‍ മുന്നറിയിപ്പ് നല്‍കുന്നു. ആറ് കാര്യങ്ങളാണ് ഭര്‍ത്താവിന്റെ അവിഹിത ബന്ധത്തിന്റെ സൂചനകളായി പരിഗണിക്കാവുന്നതെന്ന് ഡോ. ആമി ഇവേഴ്സണ്‍ പറയുന്നു.
1. ഭര്‍ത്താവിന്റെ കുടുംബപാരമ്പര്യം എങ്ങനെയുള്ളതാണെന്ന് ആദ്യം മനസ്സിലാക്കുക. രക്ഷിതാക്കളുടെ ബന്ധത്തില്‍ ഉലച്ചിലുണ്ടാവുകയോ, അവര്‍ക്കാര്‍ക്കെങ്കിലും മറ്റൊരു ബന്ധമുണ്ടായിരിക്കുകയോ ചെയ്താല്‍, അത് അയാളിലേക്കും പകര്‍ന്നിട്ടുണ്ടാവാം. ഇത്തരം സാഹചര്യങ്ങളില്‍ വളര്‍ന്നുവന്ന ഒരാള്‍ക്ക് അവിഹിതബന്ധമുണ്ടാകാനുള്ള സാധ്യത കൂടുതലാണ്.
2. ഭര്‍ത്താവിന് മുമ്പെന്തെങ്കിലും ബന്ധമുണ്ടായിരുന്നോ എന്നതും നിര്‍ണായകമാണ്. ഡേറ്റിങ് ആപ്പുകളും ലൈംഗികച്ചുവയുള്ള സന്ദേശങ്ങളയക്കലും നീലച്ചിത്രങ്ങള്‍ കാണുന്ന ശീലവും ഉണ്ടോ?. ലൈംഗികാസക്തി കൂടുതലുള്ളയാളാണെങ്കിലും അവിഹിത ബന്ധത്തിലേക്ക് പോകാന്‍ സാധ്യതയേറെയാണ്. അവിഹിത ബന്ധം പുലര്‍ത്തുന്ന സുഹൃത്തുക്കളുമായുള്ള ഇടപഴകലും അത്തരമൊരു ബന്ധത്തിലേക്ക് നയിക്കാനുള്ള സാധ്യത കൂട്ടും.
3. അവിഹിത ബന്ധങ്ങള്‍ പലപ്പോഴും സെക്സ് മാത്രം ആഗ്രഹിച്ചുണ്ടാകുന്നതായിരിക്കില്ല. അത് പലതില്‍നിന്നുമുള്ള രക്ഷപ്പെടലായും ഉപയോഗിച്ചേക്കാം. ജോലിസ്ഥലത്തെ സമ്മര്‍ദത്തില്‍നിന്നുള്ള രക്ഷയ്ക്കായും മറ്റൊരു ബന്ധത്തെ ആശ്രയിക്കുന്നവരുണ്ട്. ജോലിയില്‍്സഥാനക്കയറ്റമോ മറ്റോ ലഭിക്കുന്നതിലൂടെ കൈവരുന്ന അമിതാത്മവിശ്വാസവും മറ്റൊരു ബന്ധത്തിലേക്ക് നയിച്ചെന്നിരിക്കാം. ഉറ്റബന്ധുക്കളുടെയോ സുഹൃത്തുക്കളുടെയോ മരണമുണ്ടാക്കുന്ന ആഘാതവും മറ്റൊരു ബന്ധത്തിലേക്ക് വഴിവെക്കാം.
4. സ്വഭാവത്തിലുണ്ടാകുന്ന മാറ്റങ്ങള്‍ നിരീക്ഷിച്ചാലും അവിഹിത ബന്ധമുണ്ടോ എന്ന് തിരിച്ചറിയാനാകും. മുമ്പത്തേക്കാള്‍ കണ്ണാടിയുടെ മുന്നില്‍ ചെലവഴിക്കുകയോ സൗന്ദര്യ വര്‍ധക വസ്തുക്കളില്‍ മുമ്പില്ലാത്തവിധം താത്പര്യം പ്രകടിപ്പിക്കുകയോ ചെയ്താല്‍ ന്യായമായും സംശയിക്കാവുന്നതാണ്. വേഷവിധാനത്തിലും മറ്റും അമിത ശ്രദ്ധ പുലര്‍ത്തുക. ഫോണില്‍ സംസാരിക്കുമ്പോള്‍ പങ്കാളിയുടെ സാന്നിധ്യം ഒഴിവാക്കുക, അടക്കിപ്പിടിച്ച് സംസാരിക്കുക, സാമൂഹിക മാധ്യമങ്ങളില്‍ കൂടുതലായി ഇടപഴകുക തുടങ്ങിയവയൊക്കെ സൂചനകളാണ്.
5. നിങ്ങളെക്കുറിച്ചുള്ള ഭര്‍ത്താവിന്റെ അഭിപ്രായത്തില്‍ പ്രകടമായ വ്യത്യാസം വരുന്നുണ്ടോ എന്നും ശ്രദ്ധിക്കുക. നിങ്ങളുടെ സൗന്ദര്യത്തെക്കുറിച്ചോ മറ്റോ പറഞ്ഞ് സ്ഥിരം പ്രശ്നങ്ങളും വഴക്കും സൃഷ്ടിക്കാന്‍ ശ്രമിക്കുന്നുണ്ടെങ്കില്‍ മറ്റാരോ അദ്ദേഹത്തിന്റ മനസ്സിലുണ്ടെന്ന് ഉറപ്പിക്കാം. കുറ്റബോധത്തിന്റെ പുറത്താകാം ഇത്തരം വഴക്കുകളിലേറെയും ഉണ്ടാവുന്നത്. നിങ്ങളുടെ ലൈംഗിക ജീവിതത്തെയും അത് ബാധിച്ചുതുടങ്ങും.
6. ഭര്‍ത്താവിന് പരസ്ത്രീ ബന്ധമുണ്ടാകുന്നതിന് അദ്ദേഹത്തെ മാത്രം കുറ്റം പറയുന്നതില്‍ അര്‍ഥമില്ല. നിങ്ങളുടെ ജീവിതത്തില്‍ സമീപകാലത്തുണ്ടായ മാറ്റം നിങ്ങള്‍കൂടി പരിശോധിക്കുക. നിങ്ങള്‍ക്ക് ഭര്‍ത്താവിനെ ശ്രദ്ധിക്കാന്‍ സമയം കിട്ടാതെ വരികയോ കൂടുതല്‍ സമയം മറ്റെന്തെങ്കിലും കാര്യത്തില്‍ ചെലവിടാന്‍ തുടങ്ങുകയോ ചെയ്തിട്ടുണ്ടെങ്കില്‍ അതും ഭര്‍ത്താവിനെ മറ്റൊരു ബന്ധത്തിലേക്ക് നയിക്കാമെന്ന് വിലയിരുത്തപ്പെടുന്നു.
