ബംഗളൂരു: കര്ണാടകയില് കോണ്ഗ്രസ്-ജെ.ഡി.എസ് സര്ക്കാര് വ്യാഴാഴ്ച വിശ്വാസ വോട്ട് തേടും. ഇന്ന് ചേര്ന്ന കാര്യോപദേശക സമിതി യോഗമാണ് വ്യാഴാഴ്ച രാവിലെ 11ന് വിശ്വാസ പ്രമേയം ചര്ച്ച ചെയ്യാന് തീരുമാനിച്ചത്. കോണ്ഗ്രസിന്റെ 12 എം.എല്.എമാര് ഉള്പ്പെടെ 16 എം.എല്.എമാര് രാജിവച്ച് ബി.ജെ.പിയിലേക്ക് കൂറുമാറിയതോടെയാണ് കര്ണാക സര്ക്കാര് വീണ്ടും പ്രതിസന്ധിയിലായത്.
സ്പീക്കര് രാജി സ്വീകരിക്കാതെ തീരുമാനം വൈകിപ്പിക്കുന്നതിനെതിരെ എം.എല്.എമാര് നല്കിയ ഹര്ജിയില് സുപ്രീം കോടതി നാളെ തീരുമാനം പ്രഖ്യാപിക്കാനിരിക്കെയാണ് വ്യാഴാഴ്ച വിശ്വാസ വോട്ട് തീരുമാനിച്ചിരിക്കുന്നത്.
നിയമസഭയില് മുഖ്യമന്ത്രി തന്നെയാണ് വിശ്വാസ വോട്ട് തേടുമെന്ന് പ്രഖ്യാപിച്ചത്. തുടര്ന്ന് ഇതിനുള്ള സമയം നിശ്ചയിക്കാന് സ്പീക്കറോട് ആവശ്യപ്പെടുകയും ചെയ്തു. കോണ്ഗ്രസ് ക്യാമ്പില് നിന്ന് ബി.ജെ.പിയിലേക്കുള്ള കൂറുമാറ്റം തുടക്കം മുതല് തന്നെ കുമാരസ്വാമി സര്ക്കാരിനെ പ്രതിസന്ധിയിലാക്കിയിരുന്നു. ഭരണപക്ഷത്തെ 16 എം.എല്.എമാരും രണ്ട് സ്വതന്ത്രരും പിന്തുണ പിന്വലിച്ചതോടെ സര്ക്കാര് ന്യൂനപക്ഷമായിരുന്നു.
മന്ത്രിമാര് ഇല്ലാതെ സഭ ചേരുന്നത് എങ്ങനെയെന്നു ചോദിച്ച് ബിജെപി നിയമസഭ കൗണ്സിലില് ബഹളമുണ്ടാക്കി. മന്ത്രിമാര് രാജിവച്ചു എന്ന് മുഖ്യമന്ത്രി തന്നെ പ്രഖ്യാപിച്ചിട്ടുണ്ട്. പിന്നെ എങ്ങനെ സഭ ചേരുമെന്നായിരുന്നു ബിജെപി അംഗങ്ങളുടെ ചോദ്യം. ടാക്സി വിളിക്കുന്നത് പോലെ വിമാനങ്ങള് വാടകക്ക് എടുക്കുന്നവരുടെ പദ്ധതികള് വിജയിക്കില്ലെന്നും വിശ്വാസവോട്ടെടുപ്പില് ജയിക്കുമെന്നും മുഖ്യമന്ത്രി കുമാരസ്വാമി പ്രതികരിച്ചു.
വിമതരെക്കൂടാതെ കോണ്ഗ്രസ്-ജെഡിഎസ് സഖ്യസര്ക്കാര് വിശ്വാസവോട്ടെടുപ്പിനെ നേരിട്ടാല് സ്പീക്കര് ഉള്പ്പടെ 101 അംഗങ്ങള് മാത്രമാണ് ഭരണപക്ഷത്തുള്ളത്(കോണ്. 66, ജെഡിഎസ് 34). സഭയിലെ ആകെ അംഗങ്ങള് 208 ആണ്. കേവലഭൂരിപക്ഷത്തിന് 105 അംഗങ്ങളുടെ പിന്തുണയാണ് ആവശ്യം. ബിജെപിക്ക് 105 അംഗങ്ങളാണുള്ളത്. സര്ക്കാരിന് പിന്തുണ പിന്വലിച്ച് ബിജെപി പക്ഷത്തേക്ക് പോയ സ്വതന്ത്രനും കെപിജെപി അംഗവും കൂടിയാകുമ്പോള് ബിജെപിക്ക് 107 പേരുടെ പിന്തുണയുണ്ടാകും.
