ന്യൂഡൽഹി∙ പന്ത്രണ്ടു വയസ്സിൽ താഴെയുള്ള പെൺകുട്ടികളെ ലൈംഗികമായി പീഡിപ്പിച്ചാൽ പ്രതികൾക്കു വധശിക്ഷ നൽകാൻ വ്യവസ്ഥ ചെയ്യുന്ന ഓർഡിനൻസിന് രാഷ്ട്രപതി രാംനാഥ് കോവിന്ദിന്റെ അനുമതി. ഇതോടെ 12 വയസ്സിൽ താഴെയുള്ള പെൺകുട്ടികളെ പീഡിപ്പിക്കുന്നവർക്ക് വധശിക്ഷ വിധിക്കാൻ കോടതിക്ക് അധികാരമായി. 12 വയസിനു താഴെയുള്ള കുട്ടികളെ ശാരീരികമായി പീഡിപ്പിക്കുന്നവര്ക്ക് വധശിക്ഷയും, 16 വയസില് താഴെയുള്ള കുട്ടികളെ പീഡിപ്പിക്കുന്നവര്ക്ക് 10 വര്ഷം മുതല് 20 വര്ഷം വരെ ജീവപര്യന്തം ശിക്ഷയുമാണ് പോസ്കോ നിര്ദേശിക്കുന്നത്.
പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയില് ഇന്നലെ ചേര്ന്ന മന്ത്രിസഭാ യോഗം ഓര്ഡിനന്സിന് അംഗീകാരം നല്കിയിരുന്നു. ഈ നിയമം ഭേദഗതി ചെയ്താണ് ഓര്ഡിനന്സ് ഇറക്കിയത്. നിലവില് പോക്സോ നിയമപ്രകാരം കുട്ടികള്ക്കെതിരെ ലൈംഗികാതിക്രമങ്ങള്ക്ക് കുറഞ്ഞത് 7വര്ഷവും കൂടിയത് ജീവപര്യന്തം ശിക്ഷയുമാണ് നിര്ദേശിക്കുന്നത്. ഇതാണ് വധശിക്ഷയാക്കി ഉയര്ത്തിയത്.
കുട്ടികൾക്കു നേരേയുള്ള ലൈംഗിക അതിക്രമങ്ങൾ തടയുന്നതിനുവേണ്ടി 2012ലാണ് കേന്ദ്ര സര്ക്കാര് പോക്സോ നിയമം നടപ്പില് വരുത്തുന്നത്. 16 വയസ്സില് താഴെയുള്ള പെണ്കുട്ടികളെ ബലാത്സംഗം ചെയ്യുന്നവര്ക്ക് മുന്കൂര് ജാമ്യം അനുവദിക്കരുതെന്നും വ്യവസ്ഥയുണ്ട്. രാജ്യമെങ്ങും പെൺകുഞ്ഞുങ്ങൾക്കു നേരെ ആക്രമണം വർധിച്ചതിനെ തുടർന്ന് ഉയർന്ന ജനരോഷത്തിന്റെ പശ്ചാത്തലത്തിലാണു കേന്ദ്രമന്ത്രിസഭയുടെ തീരുമാനം. ബലാത്സംഗ കേസുകളുടെ വിചാരണാ നടപടികള് വേഗത്തിലാക്കാനുള്ള വ്യവസ്ഥയും ഓര്ഡിനന്സിലുണ്ട്. ബലാത്സംഗക്കേസുകളില് വിചാരണ പൂര്ത്തിയാക്കാനുള്ള പരമാവധി കാലാവധി രണ്ട് മാസമായിരിക്കും.
