തിരുവനന്തപുരം: യൂണിവേഴ്സിറ്റി കോളേജില് വിദ്യാര്ത്ഥിനി ആത്മഹത്യ ചെയ്യാന് ശ്രമിച്ച സംഭവത്തില് ചാന്സലര് കൂടിയായ ഗവര്ണര് പി സദാശിവം വൈസ് ചാന്സലര് വി പി മഹാദേവന് പിള്ളയോട് റിപ്പോര്ട്ട് തേടി. എന്താണ് യഥാര്ത്ഥത്തില് സംഭവിച്ചതെന്ന സ്ഥിതിവിവരറിപ്പോര്ട്ട് നല്കണമെന്നാണ് വൈസ് ചാന്സലറോട് ഗവര്ണര് ആവശ്യപ്പെട്ടിരിക്കുന്നത്.
സംഭവത്തില് സംസ്ഥാന മനുഷ്യാവകാശ കമ്മീഷന് സ്വമേധയാ കേസെടുത്തിട്ടുണ്ട്. കോളേജ് വിദ്യാഭ്യാസ ഡയറക്ടറും കോളേജ് പ്രിന്സിപ്പലും അന്വേഷണം നടത്തി ഒരു മാസത്തിനകം റിപ്പോര്ട്ട് സമര്പ്പിക്കണമെന്ന് കമ്മീഷന് അധ്യക്ഷന് ജസ്റ്റിസ് ആന്റണി ഡൊമിനിക് ആവശ്യപ്പെട്ടു.
എന്നാല് വിദ്യാര്ത്ഥിയോ രക്ഷിതാക്കളോ ഇതുവരെ പൊലീസില് പരാതി നല്കിയിട്ടില്ല. ആത്മഹത്യക്ക് ശ്രമിച്ച പെണ്കുട്ടി പരാതിയൊന്നും നല്കിയിട്ടില്ലെന്ന് കോളേജ് പ്രിന്സിപ്പാളും പറഞ്ഞു. അതേസമയം സംഘടനക്കെതിരെ ഉയര്ന്ന ആരോപണങ്ങളെ പൂര്ണ്ണമായും തള്ളിക്കളയുകയാണ് എസ്എഫ്ഐ.
സംഭവത്തില് അന്വേഷണം ആവശ്യപ്പെട്ട് കെഎസ്യു സംസ്ഥാന സമിതി ഗവര്ണര്ക്ക് നിവേദനം നല്കിയിരുന്നു. കേരളാ യൂണിവേഴ്സിറ്റിയിലെ വിദ്യാര്ത്ഥി രാഷട്രീയത്തെക്കുറിച്ചും സംഘടനാ പ്രവര്ത്തനങ്ങളെക്കുറിച്ചും വിശദമായ അന്വേഷണം നടത്തണമെന്നും നിവേദനത്തില് കെഎസ്യു ആവശ്യപ്പെട്ടു.
എസ്എഫ്ഐ മാനസികമായി നിരന്തരം പീഡിപ്പിച്ചുവെന്ന് കുറിപ്പെഴുതി വച്ചാണ് യൂണിവേഴ്സിറ്റി കോളേജിലെ വിദ്യാര്ത്ഥിനി ആത്മഹത്യക്ക് ശ്രമിച്ചത്. രാവിലെ കോളേജിലെ ലേഡീസ് റൂം വൃത്തിയാക്കാനെത്തിയവരാണ് രക്തംവാര്ന്ന് ബോധരഹിതയായ നിലയില് വിദ്യാര്ഥിനിയെ കണ്ടത്. ഉടനെ ആശുപത്രിയിലെത്തിച്ചതിനാല് അപകട നില തരണം ചെയ്തു. ഒന്നാം വര്ഷ ഡിഗ്രി വിദ്യാര്ത്ഥിനിയാണ് പെണ്കുട്ടി.
കോളേജിലെ എസ്എഫ്ഐ നേതാക്കളുടെ കടുത്ത ഭീഷണി നേരിടുന്നെന്ന് പെണ്കുട്ടി ആത്മഹത്യാക്കുറിപ്പില് എഴുതിയിരുന്നു. പാര്ട്ടി പരിപാടികളില് പങ്കെടുക്കാന് കൂട്ടാക്കാത്തതിനാല് തന്നെ ഒറ്റപ്പെടുത്തുകയാണ്. അധ്യയന വര്ഷം നഷ്ടമാക്കി സമരങ്ങളും മറ്റും നടത്തുന്നതിനെതിരെ സാമൂഹ്യ മാധ്യമങ്ങളില് പോസ്റ്റ് ചെയ്തതോടെ ഭീഷണി ശക്തമായെന്നും കുറിപ്പിലുണ്ട്. ഈ സാഹചര്യത്തിലാണ് സംഭവത്തെക്കുറിച്ചും യൂണിവേഴ്സിറ്റിയിലെ സംഘടനാ പ്രവര്ത്തനങ്ങളെക്കുറിച്ചും അന്വേഷിക്കണമെന്നാവശ്യപ്പെട്ട് കെഎസ്യു ഗവര്ണര്ക്ക് നിവേദനം നല്കിയത്.
