കണ്ണുര്‍: കണ്ണുരിലെ കള്ളവോട്ടുമായി ബന്ധപ്പെട്ട് ഒമ്പത് ലീഗ് പ്രവര്‍ത്തകര്‍ക്കും ഒരു സി.പി.എം പ്രവര്‍ത്തകനുമുള്‍പ്പെടെ പത്തുപേര്‍ക്കെതിരെ കേസ് രജിസ്റ്റര്‍ ചെയ്തു. ഇന്ത്യന്‍ ശിക്ഷാ നിയമത്തിലെ 171 സി, ഡി എന്നീ ഉപവകുപ്പുകള്‍ പ്രകാരം ആള്‍മാറാട്ടത്തിനും തെരഞ്ഞെടുപ്പ് അട്ടിമറിക്കലിനുമാണ് കേസ്.
ധര്‍മ്മടം മണ്ഡലത്തില്‍ കള്ളവോട്ട് ചെയ്ത വേങ്ങാട് സ്വശേി സായൂജിനെതിരെ കൂത്തുപറമ്പ് പോലീസാണ് കേസ് എടുത്തിരിക്കുന്നത്. 52ാം നമ്പര്‍ ബൂത്തിലെ വോട്ടറും കോയമ്പത്തൂരില്‍ താമസക്കാരനുമായ അഖില്‍ അത്തിക്ക, 53ാം നമ്പര്‍ ബൂത്തിലെ വോട്ടറും മലപ്പുറത്തു താമസക്കാരനുമായ മുഹമ്മദ് ഷാഫി എന്നിവരുടെ വോട്ടുകളാണ് സായൂജ് ചെയ്തത്. കണ്ണൂരിലെ യു.ഡി.എഫ് സ്ഥാനാര്‍ത്ഥി കെ.സുധാകരന്‍ നല്‍കിയ പരാതിയിലാണ് നടപടി. വീഡിയോ പരിശോധിച്ച് തെളിവുകള്‍ സഹിതമായിരുന്നു പരാതി നല്‍കിയിരുന്നത്. സായൂജിനെ വിളിച്ചുവരുത്തി കലക്ടര്‍ മൊഴിയെടുക്കുകയും ചെയ്തിരുന്നു. ഇതിനു ശേഷമാണ് കേസെടുക്കാന്‍ നിര്‍ദേശം നല്‍കിയത്.
പാമ്പുരുത്തിയില്‍ ഒമ്പത് ലീഗ് പ്രവര്‍ത്തകര്‍ക്കെതിരെയും കേസെടുത്തിട്ടുണ്ട്. അബ്ദുള്‍ സലാം, അബ്ദുള്‍ സലാം, കെ.പി സാദിഖ്, ഷമല്‍, മുബഷീര്‍, എന്നിവര്‍ക്കെതിരെയാണ് കേസെടുക്കാന്‍ വരണാധികാരിയായ ജില്ലാ കലക്ടര്‍ പോലീസിന് നിര്‍ദേശം നല്‍കിയത്. ഇവര്‍ 12 കള്ളവോട്ടുകളാണ് ചെയ്തത്.
മുഖ്യമന്ത്രി പ്രതിനിധീകരിക്കുന്ന ധര്‍മ്മടം മണ്ഡലത്തില്‍ പ്രായപൂര്‍ത്തയാകാത്ത പെണ്‍കുട്ടി മറ്റൊരാളുടെ വോട്ട് ചെയ്തതായും കണ്ടെത്തിയിട്ടുണ്ട്. മണ്ഡലത്തില്‍ മുഖ്യമന്ത്രിയുടെ പ്രതിനിധിയായി പ്രവര്‍ത്തിക്കുന്ന പി.ബാലന്റെ ബന്ധുവാണ് ഈ പെണ്‍കുട്ടി. പരാതിയില്‍ വസ്തുതയുണ്ടെന്ന് കണ്ടെത്തിയതോടെ തിങ്കളാഴ്ച ഹാജരാകാന്‍ കലക്ടര്‍ പെണ്‍കുട്ടിക്ക് നിര്‍ദേശം നല്‍കിയിട്ടുണ്ട്
