തൃശ്ശൂര്: കണ്ണൂര്, വിയ്യൂര് സെന്ട്രല് ജയിലുകളില് ജയില് വകുപ്പിന്റെ മിന്നല് പരിശോധന. കണ്ണൂരില് ജയില് ഡിജിപി ഋഷിരാജ് സിംഗും വിയ്യൂരില് യതീഷ് ചന്ദ്രയുമാണ് റെയ്ഡ് നടത്തിയത്. പുലര്ച്ചെ നാല് മണിയോടെയായിരുന്നു മിന്നല് പരിശോധന. കണ്ണൂരിലെ റെയ്ഡില് നിന്ന് മൊബൈല്ഫോണ്, കഞ്ചാവ്, പുകയില, പണം, സിം കാര്ഡ്, ചിരവ, ബാറ്ററികള്, റേഡിയോ എന്നിവ കണ്ടെത്തി. റേഞ്ച് ഐജി അശോക് യാദവ്, എസ്പി പ്രതീഷ് കുമാര് എന്നിവരും ഋഷിരാജ് സിംഗിനൊപ്പമുണ്ടായിരുന്നു. 150 പൊലീസുകാരുടെ സംഘവുമായാണ് ഇവരെത്തിയത്.
തൃശ്ശൂര് വിയ്യൂര് ജയിലില് പുലര്ച്ചെ നാടകീയമായി നടത്തിയ റെയ്ഡില് ടി പി വധക്കേസ് പ്രതി ഷാഫിയില് നിന്ന് പിടിച്ചത് രണ്ട് സ്മാര്ട്ട് ഫോണുകളാണ്. തൃശ്ശൂര് പൊലീസ് കമ്മീഷണര് യതീഷ് ചന്ദ്രയാണ് ഷാഫിയില് നിന്ന് മൊബൈല് ഫോണുകള് പിടിച്ചെടുത്തത്. ഇതിന് മുമ്പ് രണ്ട് തവണ ജയിലില് ഫോണുപയോഗിച്ചതിന് ഷാഫിയെ പിടികൂടിയിട്ടുണ്ട്. റെയ്ഡില് കണ്ടെത്തിയത് നാല് ഫോണുകളാണ്. ഇതില് രണ്ടെണ്ണം ഷാഫിയുടേതാണ്. രണ്ടും സ്മാര്ട്ട് ഫോണുകളുമാണ്.
