കാലിഫോര്‍ണിയ: കാലിഫോര്‍ണിയയിലെ സാന്‍ ഡിയാഗോയിലെ സിനഗോഗില്‍ വെടിവയ്പ്പ്. ആക്രമണത്തില്‍ ഒരു സ്ത്രീ കൊല്ലപ്പെട്ടു. ഒരു കുട്ടിയുള്‍പ്പടെ മൂന്ന് പേര്‍ക്ക് പരിക്കേറ്റു. സാന്‍ മാര്‍കോസിലെ കാല്‍ സര്‍വകലാശാലയിലെ വിദ്യാര്‍ത്ഥിയായ ജോണ്‍ ഏണസ്റ്റാണ് സിനഗോഗിലേക്ക് ഇരച്ചു കയറി ആക്രമണം നടത്തിയത്. ഇയാളെ പൊലീസ് കസ്റ്റഡിയിലെടുത്തു.
പ്രാദേശിക സമയം രാവിലെ പതിനൊന്നരയോടെയാണ് ജോണ്‍ ഏണസ്റ്റ് സിനഗോഗിലേക്ക് റൈഫിളുമായി എത്തിയത്. ഒരു പ്രകോപനവുമില്ലാതെ ഇയാള്‍ ചുറ്റുമുള്ളവര്‍ക്ക് നേരെ തുരുതുരാ വെടിയുതിര്‍ക്കുകയായിരുന്നു. വെടിയേറ്റ ഒരു വൃദ്ധ സംഭവസ്ഥലത്ത് വച്ച് തന്നെ മരിച്ചു. രണ്ട് പുരുഷന്‍മാര്‍ക്കും ഒരു പെണ്‍കുട്ടിയ്ക്കും പരിക്കേല്‍ക്കുകയും ചെയ്തു. നാല് പേരെയും ഉടനടി ആശുപത്രിയിലെത്തിച്ചെങ്കിലും വൃദ്ധയെ രക്ഷിക്കാനായില്ലെന്ന് പൊലീസ് അറിയിച്ചു.
ആക്രമണത്തിന് ശേഷം വിദ്യാര്‍ത്ഥി സ്വന്തം വാഹനത്തില്‍ കയറി രക്ഷപ്പെടാന്‍ ശ്രമിച്ചെങ്കിലും പൊലീസ് വളഞ്ഞതോടെ ഇയാള്‍ കീഴടങ്ങുകയായിരുന്നു.
പിറ്റസ്ബര്‍ഗ് സിനഗോഗില്‍ നിരവധിയാളുകളുടെ മരണത്തിനിടയാക്കിയ വെടിവെപ്പുണ്ടായി മാസങ്ങള്‍ക്ക് ശേഷമാണ് വീണ്ടും ജൂതര്‍ക്കെതിരെ ആക്രമണമുണ്ടായത്. പോലീസ് അക്രമിയെ അറസ്റ്റ് ചെയ്ത് ചോദ്യം ചെയ്തുകൊണ്ടിരിക്കുകയാണ്. ഇയാളുടെ കാറില്‍ നിന്നും മറ്റൊരും കൈത്തോക്കും കണ്ടെത്തിയിട്ടുണ്ട്.
