നാല് വർഷമായി കുറ്റം ചുമത്താതെ ജയിലിൽ: സുപ്രീംകോടതി ഞെട്ടൽ രേഖപ്പെടുത്തി; മഹാരാഷ്ട്ര സർക്കാരിനോട് വിശദീകരണം തേടി

ന്യൂഡൽഹി: കുറ്റം ചുമത്താതെ നാല് വർഷത്തിലധികമായി ജയിലിൽ കഴിയുന്ന മഹാരാഷ്ട്രയിലെ ഒരു പ്രതിയുടെ കേസിൽ സുപ്രീംകോടതി ശക്തമായ ആശങ്ക രേഖപ്പെടുത്തി. 2022-ൻ്റെ തുടക്കത്തിൽ കുറ്റപത്രം (ചാർജ് ഷീറ്റ്) സമർപ്പിച്ചിട്ടും വിചാരണ ആരംഭിക്കാതിരുന്നതിൽ കോടതി ഗുരുതരമായ ആശങ്ക പ്രകടിപ്പിച്ചു.

ജസ്റ്റിസുമാരായ അഹ്‌സനുദ്ദീൻ അമാനുള്ളയും പ്രശാന്ത് കുമാർ മിശ്രയും അടങ്ങിയ ബെഞ്ച് നടത്തിയ നിരീക്ഷണം ഇങ്ങനെ:

“പ്രതിയെ നാല് വർഷമായി തടവിൽ പാർപ്പിച്ചിട്ടും കുറ്റം ചുമത്താത്തത് അത്യന്തം ഞെട്ടിക്കുന്നതാണ്. 2022 ജനുവരി 13ന് ചാർജ് ഷീറ്റ് സമർപ്പിച്ചതിന് ശേഷവും വിചാരണ മുന്നോട്ട് പോയിട്ടില്ല എന്നത് വിചിത്രവും നിയമവിരുദ്ധവുമാണ്.”

പ്രോസിക്യൂഷൻ–പ്രതി കൂട്ടുകെട്ടോ?

സഹപ്രതികൾ ഹാജരാകാത്തതാണ് വിചാരണ വൈകാൻ കാരണമെന്ന് മഹാരാഷ്ട്ര സർക്കാർ നൽകിയ വിശദീകരണം ബെഞ്ച് തള്ളിക്കളഞ്ഞു.

“സഹപ്രതികൾ ഹാജരാകാത്തതിനെ കാരണമാക്കി കുറ്റം ചുമത്താതിരിക്കാൻ പ്രോസിക്യൂഷന് അവകാശമില്ല. സഹപ്രതികളുടെ ജാമ്യം റദ്ദാക്കാൻ സംസ്ഥാന സർക്കാർ അപേക്ഷ പോലും നൽകിയിട്ടില്ല എന്നതാണ് കൂടുതൽ ആശ്ചര്യം. ഇതിൽ പ്രോസിക്യൂഷനും പ്രതികളും തമ്മിൽ കൂട്ടുകെട്ട് ഉണ്ടെന്ന് തോന്നുന്നു,” കോടതി നിരീക്ഷിച്ചു.

വിശദീകരണം നൽകാൻ ഉത്തരവ്

കേസ് നീണ്ടുപോയ കാരണങ്ങൾക്കും വിചാരണ പുരോഗമിക്കാതിരുന്നതിനും വിശദീകരണം നൽകാൻ അന്വേഷണ സുപ്രണ്ട് ഓഫീസറോട് (Superintendent Officer) അമാനുള്ള ബെഞ്ച് നിർദേശം നൽകി. കൂടാതെ, വിചാരണക്കോടതി ജാമ്യത്തിലുള്ള സഹപ്രതികളെ ഹാജരാക്കാൻ എന്തുകൊണ്ട് കഴിയുന്നില്ല എന്നതിനെക്കുറിച്ച് ഒരു റിപ്പോർട്ട് സമർപ്പിക്കണമെന്നും ആവശ്യപ്പെട്ടു.

രണ്ട് റിപ്പോർട്ടുകളും മൂന്ന് ആഴ്ചയ്ക്കുള്ളിൽ കോടതിയിൽ സമർപ്പിക്കണം. ഡിസംബർ 2ന് കേസ് വീണ്ടും പരിഗണിക്കുമ്പോൾ, നൽകുന്ന വിശദീകരണം തൃപ്തികരമല്ലെങ്കിൽ കർശനമായ നിലപാട് സ്വീകരിക്കുമെന്ന് സുപ്രീംകോടതി മുന്നറിയിപ്പ് നൽകി.

മുമ്പത്തെ വിമർശനങ്ങൾ

മഹാരാഷ്ട്രയിലെ ക്രിമിനൽ വിചാരണകളുടെ മന്ദഗതിയെക്കുറിച്ച് കഴിഞ്ഞ ചില ആഴ്ചകളിൽ സുപ്രീംകോടതി വിമർശനം ഉന്നയിക്കുന്നത് ഇത് ആദ്യമായല്ല.

2025 ഒക്ടോബറിൽ, ജസ്റ്റിസുമാരായ സഞ്ജയ് കരോളും എൻ. കോട്ടിശ്വർ സിംഗും അടങ്ങിയ മറ്റൊരു ബെഞ്ച്, 2006 മുതൽ കുറ്റം ചുമത്താതെ കിടക്കുന്ന നൂറുകണക്കിന് കേസുകൾ സംസ്ഥാനത്തുണ്ടെന്ന് ചൂണ്ടിക്കാട്ടി, “ഇത് നിയമസംവിധാനത്തിന്റെ അത്യന്തം ദൗർഭാഗ്യകരമായ അവസ്ഥയാണ്” എന്ന് പരാമർശിച്ചിരുന്നു. അന്ന് ബോംബെ ഹൈക്കോടതിയുടെ രജിസ്ട്രാർ ജനറലിനോട് ഈ കേസുകളുടെ വിശദമായ റിപ്പോർട്ട് സമർപ്പിക്കാനും ആവശ്യപ്പെട്ടിരുന്നു.

File Photo: IANS