ന്യൂഡല്ഹി: കേന്ദ്രമന്ത്രി സന്തോഷ് ഗാങ്വറിന്റെ പ്രസ്താവനയ്ക്കെതിരെ രൂക്ഷ വിമര്ശനവുമായി കോണ്ഗ്രസ് നേതാവ് പ്രിയങ്ക ഗാന്ധി. യോഗ്യതയുള്ള ഉദ്യോഗാര്ഥികൾ വടക്കേ ഇന്ത്യയില് ആവശ്യത്തിന് ഇല്ലെന്നായിരുന്നു മന്ത്രിയുടെ വിവാദ പരാമര്ശം. വടക്കേ ഇന്ത്യക്കാരെ അപമാനിക്കാനാണ് മന്ത്രിയുടെ ശ്രമമെന്ന് പ്രിയങ്ക പറഞ്ഞു. അഞ്ച് വര്ഷത്തിലധികമായി നിങ്ങളുടെ സര്ക്കാര് ഇവിടെയുണ്ടെന്നും കേന്ദ്രസര്ക്കാറിന്റെ സാമ്പത്തിക നയമാണ് തൊഴില് നഷ്ടപ്പെടുവാൻ കാരണമെന്നും പ്രിയങ്ക പ്രതികരിച്ചു.
സര്ക്കാര് എന്തെങ്കിലും നല്ലത് ചെയ്യുന്നുണ്ടോയെന്നാണ് യുവാക്കള് നോക്കുന്നത്. എന്നാല്, വടക്കേ ഇന്ത്യക്കാരെ അപമാനിച്ച് രക്ഷപ്പെടാനാണ് താങ്കള് ശ്രമിക്കുന്നതെന്നും അത് ഒരിക്കലും നടക്കാത്ത കാര്യമാണെന്നും പ്രിയങ്ക ഗാന്ധി വ്യക്തമാക്കി.യുപിയിലെ ബറേയ്ലിയില് മാധ്യമങ്ങളോട് സംസാരിക്കുന്നതിനിടെയാണ് കഴിഞ്ഞ ദിവസം കേന്ദ്രമന്ത്രി വിവാദ പരാമര്ശം നടത്തിയത്.
കേന്ദ്രമന്ത്രിയുടെ പ്രസ്താവനയ്ക്കെതിരെ ബിഎസ്പി നേതാവ് മായാവതിയും രംഗത്തെത്തി. മന്ത്രി മാപ്പ് പറയണമെന്നും ബിഎസ്പി അധ്യക്ഷ ആവശ്യപ്പെട്ടു.
