പത്തനംതിട്ട: ഇടവമാസ പൂജകള്ക്കായി ശബരിമല ക്ഷേത്രനട ഇന്ന് തുറക്കും. വൈകുന്നേരം നടക്കുന്ന പൂജകള്ക്കായി ഉച്ചയ്ക്ക് പന്ത്രണ്ട് മണിയോടെ മാത്രമേ പമ്പയില് നിന്ന് സന്നിധാനത്തേക്ക് തീര്ത്ഥാടകരെ പ്രവേശിപ്പിക്കുകയുള്ളു.
വീണ്ടും നട തുറക്കുമ്പോള് യുവതീ പ്രവേശനം സംബന്ധിച്ച ആശങ്കകള് നിലനില്ക്കുകയാണ്. തെരഞ്ഞെടുപ്പ് കഴിഞ്ഞ സാഹചര്യത്തില് യുവതീ പ്രവേശനത്തിന് ചിലര് ശ്രമിക്കുമെന്ന് സൂചനകളുണ്ടായിരുന്നു. ചില ആക്ടിവിസ്റ്റ് സംഘടനകളും സ്ത്രീകളെ ശബരിമലയില് എത്തിക്കുമെന്ന് സമൂഹമാധ്യമങ്ങളിലൂടെ വ്യക്തമാക്കിയിരുന്നു. ഈ സാഹചര്യത്തില് സുരക്ഷ ശക്തമാക്കാനാണ് പൊലീസിന്റെ തീരുമാനം.
മാസപൂജയ്ക്ക് മുമ്പ് റിവ്യൂ ഹര്ജിയില് തീരുമാനമുണ്ടാകുമെന്ന് പ്രതീക്ഷിച്ചിരുന്നെങ്കിലും സുപ്രീംകോടതി വേനലവധിക്ക് പിരിഞ്ഞതോടെ അതുണ്ടായില്ല. മകരവിളക്കുകാലത്തിനുശേഷം ക്ഷേത്രനട വിവിധ സമയങ്ങളിലായി 30 ദിവസം തുറന്നിരുന്നെങ്കിലും യുവതികളാരും പ്രവേശനത്തിനെത്തുകയോ സംരക്ഷണം ആവശ്യപ്പെട്ട് പൊലീസിനെയോ ജില്ലാ ഭരണകൂടത്തെയോ സമീപിക്കുകയോ ചെയ്തിട്ടില്ല. എന്നാല് ഈ സാഹചര്യം തുടരാന് സാധ്യതയില്ലെന്നാണ് പൊലീസിന്റെ വിലയിരുത്തല്. ആചാര സംരക്ഷണത്തിനായി സംഘപരിവാര് സംഘടനകളും രംഗത്തിറങ്ങുമെന്നാണ് സൂചന.
