ഹൈദരാബാദ്: തെലുങ്കാനയില് കഴിഞ്ഞ ദിവസം കാണാതായ ബഹുജന് ലെഫ്റ്റ് ഫ്രണ്ടിന്റെ ഭിന്നലിംഗക്കാരിയായ സ്ഥാനാര്ഥി ചന്ദ്രമുഖി മുവ്വലയെ കണ്ടെത്തി. ഒരു ദിവസത്തെ നാടകീയ രംഗങ്ങള്ക്കൊടുവില് സെക്കന്ദരാബാദിലെ ഭിന്നലിംഗക്കാരുടെ കോളനിയില്നിന്നാണ് ചന്ദ്രമുഖിയെ പോലീസ് കണ്ടെത്തിയത്.10 ഭിന്നലിംഗക്കാരായ സുഹൃത്തുക്കള്ക്കൊപ്പം ഇവരെ പോലീസ് സ്റ്റേഷനിലെത്തിച്ചു.
തെലുങ്കാന തെരഞ്ഞെടുപ്പില് മത്സരിക്കുന്ന ആദ്യ ഭിന്നലിംഗക്കാരിയായ സ്ഥാനാര്ഥിയായ ചന്ദ്രമുഖിയെ ചൊവ്വാഴ്ച രാത്രി മുതല് കാണാതായിരുന്നു. ചൊവ്വാഴ്ച രാത്രിയില് താമസസ്ഥലമായ ജവഹര്നഗറിലാണ് ഇവരെ അവസാനമായി കണ്ടത്. ഇതിനു ശേഷം വിവരമൊന്നുമില്ലായിരുന്നു. മൊബൈല് ഫോണും സ്വിച്ച്ഡ് ഓഫായിരുന്നു. ഇതോടെ ബുധനാഴ്ച രാവിലെ ചന്ദ്രമുഖിയുടെ അമ്മ ആനന്ദമ്മയാണ് പോലീസില് പരാതി നല്കിയത്. ആനന്ദമ്മയുടെ പരാതിയില് കോടതി ഹേബിയസ് കോര്പസ് പുറപ്പെടുവിച്ചിരുന്നു. ഇതിന്റെ അടിസ്ഥാനത്തില് ചന്ദ്രമുഖിയെ പോലീസ് വ്യാഴാഴ്ച കോടതിയില് ഹാജരാക്കും.
