തിരുവനന്തപുരം: തിരുവനന്തപുരം വിമാനത്താവളത്തിലെ ഡ്യൂട്ടി ഫ്രീ ഷോപ്പില്‍ നിന്നും മദ്യം വാങ്ങിയവരില്‍ ഒന്നര വയസുകാരിയും. സംഭവത്തില്‍ സംശയം തോന്നിയ കസ്റ്റംസ് ഓഫീസര്‍ നടത്തിയ അന്വേഷണത്തിലാണ് ഞെട്ടിപ്പിക്കുന്ന വിവരങ്ങള്‍ വെളിപ്പെട്ടത്. സംഭവത്തില്‍ വിമാനത്താവളത്തിലെ ഡ്യൂട്ടി ഫ്രീ ഷോട്ട് സിഇഒയെ കസ്റ്റഡിയിലെടുത്തു. പതിമൂവായിരത്തോളം പേരുടെ വിവരങ്ങള്‍ ചോര്‍ത്തി ആറുകോടിയിലധികം രൂപ തട്ടിച്ചതായി കസ്റ്റംസ് കണ്ടെത്തി.
ഒന്നരവയസ്സുള്ള പെണ്‍കുഞ്ഞിന്റെയും ഏഴുവയസ്സുകാരന്റെയും ഒട്ടേറെ സ്ത്രീകളുടെയും പേരില്‍ മദ്യം വാങ്ങിയതായാണ് തെളിഞ്ഞത്. അനുവദിക്കപ്പെട്ട അളവിലുമധികം പലരും വാങ്ങിയത് ശ്രദ്ധയില്‍പ്പെട്ടതിനെത്തുടര്‍ന്ന് കസ്റ്റംസ് വിഭാഗം ബന്ധപ്പെട്ടവര്‍ക്ക് നോട്ടീസ് അയച്ചതോടെയാണ് ക്രമക്കേടിന്റെ യഥാര്‍ത്ഥ രൂപം പുറത്തുവന്നത്. വിശദമായ ചോദ്യംചെയ്യലിനായി കൊച്ചി കസ്റ്റംസ് കമ്മിഷണറേറ്റിലേക്ക് കഴിഞ്ഞദിവസമാണ് സുന്ദരവാസനെ വിളിച്ചുവരുത്തിയത്.
ഹാജരാക്കിയ രേഖകള്‍ പലതും വ്യാജമാണെന്ന് കണ്ടെത്തി. നികുതിയടയ്ക്കാതെ വ്യാജരേഖകളിലൂടെ സംഘടിപ്പിക്കുന്ന വിദേശമദ്യം കൂടിയ വിലയ്ക്ക് മറിച്ചുകൊടുക്കുകയായിരുന്നു പതിവ്. കസ്റ്റംസിന്റെ സമന്‍സുകളോട് സ്ഥാപനത്തിന്റെ മാനേജിംഗ് ഡയറക്ടര്‍ പ്രതികരിച്ചിട്ടില്ല. ഷോപ്പിലെ ജീവനക്കാരില്‍ മിക്കവരും ക്രമക്കേട് നടന്നതായി സമ്മതിച്ചു. നികുതിയടയ്ക്കാന്‍ വീഴ്ചവരുത്തിയ 104 വകുപ്പുപ്രകാരമാണ് അറസ്റ്റ്.
