വാരാണസി: ലോഡ്ജില് യുവതിയെ ബലാത്സംഗം ചെയ്ത ബി.ജെ.പി നേതാവ് കനയ്യ ലാല് മിശ്ര അറസ്റ്റില്. ജോലി നല്കാമെന്ന വാഗ്ദാനം ചെയ്ത് സര്ക്കാര് ഉദ്യോഗസ്ഥയുമായുള്ള കൂടിക്കാഴ്ചക്കെന്ന മട്ടില് വിളിച്ചുവരുത്തി ലോഡ്ജില് വെച്ച് ബലാത്സംഗം ചെയ്യുകയായിരുന്നുവെന്ന് യുവതി നല്കിയ പരാതിയില് പറയുന്നു. നിരവധി മാസങ്ങളായി മിശ്രയുമായി ഫോണില് ആശയവിനിമയം നടത്തിയിരുന്നുവെന്നും ഇയാള് പാര്ട്ടിയുടെ ഭദോഹി ജില്ല പ്രസിഡന്റ് ആയിരുന്നുവെന്നും ഇവര് പറഞ്ഞു. തുടര്ന്ന് സിഗ്ര പൊലീസ് സ്ഥലത്തെത്തുകയും മിശ്രയെ അറസ്റ്റ് ചെയ്യുകയായിരുന്നു.
ബലാത്സംഗക്കേസില് ബി.ജെ.പിയുടെ യു.പിയിലെ തന്നെ മറ്റൊരു നേതാവായ കുല്ദീപ് സിങ് സെന്ഗാറിനെ സി.ബി.ഐ അറസ്റ്റ് ചെയ്തതിന് പിന്നാലെയാണ് മറ്റൊരു ബി.ജെ.പി നേതാവും ഇത്തരമൊരു കേസില് പിടിക്കപ്പെടുന്നത്. മുറിയില് പ്രവേശിച്ച ഉടന് 50കാരനായ ഇയാള് യുവതിക്കുനേരെ ലൈംഗികാതിക്രമം നടത്തിയെന്നും പ്രതിരോധിക്കാന് ശ്രമിക്കുകയും ഒച്ചവെക്കുകയും ചെയ്തതിനൊടുവില് മറ്റു മുറികളില് ഉണ്ടായിരുന്നവരുടെ ശ്രദ്ധയില്പെടുകയായിരുന്നുവെന്നും പേര് വെളിപ്പെടുത്താത്ത പൊലീസ് ഉദ്യോഗസ്ഥന് പറഞ്ഞു.
