ജെയ്പൂര്‍: നിയമസഭാ തെരഞ്ഞെടുപ്പ് നടക്കാനിരിക്കുന്ന രാജസ്ഥാനില്‍ ബി.ജെ.പിയെ പരാജയപ്പെടുത്താന്‍ കോണ്‍ഗ്രസിന് സഖ്യം ആവശ്യമില്ലെന്ന് കോണ്‍ഗ്രസ് നേതാവ് സച്ചിന്‍ പൈലറ്റ്. രണ്ട് പാര്‍ട്ടികള്‍ക്ക് മാത്രം സ്വാധീനമുള്ള സംസ്ഥാനത്ത് കോണ്‍ഗ്രസ് സ്വന്തം ശക്തി ഉപയോഗിച്ച്‌ ബി.ജെ.പിയെ പരാജയപ്പെടുത്തുമെന്നും സച്ചിന്‍ പൈലറ്റ് പറഞ്ഞു. ബി.ജെ.പിയെ ദേശീയതലത്തില്‍ വെല്ലുവിളിക്കാന്‍ കഴിയുന്ന ഏക പാര്‍ട്ടി കോണ്‍ഗ്രസാണ്.
ഏതൊരു ബി.ജെ.പി വിരുദ്ധ സഖ്യത്തിന്റേയും കേന്ദ്ര സ്ഥാനത്ത് കോണ്‍ഗ്രസാകുമെന്നും സച്ചിന്‍ പൈലറ്റ് പറഞ്ഞു. മാധ്യപ്രദേശിലും രാജസ്ഥാനിലും കര്‍ഷകര്‍ പ്രശ്‌നങ്ങള്‍ നേരിടുകയാണ്. രജസ്ഥാനില്‍ 150 കര്‍ഷകര്‍ ആത്മഹത്യ ചെയ്തിട്ടുണ്ട്. ഇവിടെയൊന്നും ബി.ജെ.പി കര്‍ഷകപ്രശ്‌നങ്ങള്‍ പരിഹരിക്കാന്‍ തയ്യാറായിട്ടില്ലെന്നും കഴിഞ്ഞ ഉപതെരഞ്ഞെടുപ്പുകളുടെ ഫലം സൂചിപ്പിക്കുന്നത് രാജസ്ഥാനില്‍ ബി.ജെ.പിയുടെ ശക്തി ക്ഷയിച്ചു എന്നാണെന്നും അദ്ദേഹം പറഞ്ഞു.
