മുംബൈ: മഹാരാഷ്ട്രയിലെ ഗഡ്ചിറോളിയില് സൈനിക വാഹനത്തിനു നേരെ മാവോയിസ്റ്റ് ആക്രമണം. പതിനഞ്ച് സൈനികരും ഡ്രൈവറും കൊല്ലപ്പെട്ടു. സൈനികരുമായി പോകുകയായിരുന്ന വാഹനമാണ് ഐഇഡി സ്ഫോടനത്തില് മാവോയിസ്റ്റുകള് തകര്ത്തത്. തെരഞ്ഞെടുപ്പ് ഡ്യൂട്ടി കഴിഞ്ഞ് മടങ്ങുകയായിരുന്ന സൈനികര് സഞ്ചരിച്ച വാഹനമാണ് ആക്രമണത്തിനിരയായത് . സ്ഫോടനത്തില് സൈന്യം സഞ്ചരിച്ച വാഹനം പൂര്ണ്ണമായും തകര്ന്നു.
സ്വകാര്യ വാഹനത്തിലാണ് ഉദ്യോഗസ്ഥര് സഞ്ചരിച്ചിരുന്നത്. ഏത് സാഹചര്യത്തിലാണ് തെരഞ്ഞെടുപ്പ് ഡ്യൂട്ടി കഴിഞ്ഞ് മടങ്ങുകയായിരുന്ന ഉദ്യോഗസ്ഥര് സ്വകാര്യ വാഹനത്തില് സഞ്ചരിച്ചതെന്ന് വ്യക്തമായിട്ടില്ല. ഗുരുതരമായ സുരക്ഷാ വീഴ്ചയാണ് ഉണ്ടായതെന്നാണ് പ്രാഥമിക നിഗമനം.
ഇന്ന് രാവിലെ കുര്ഖേഡയില് കരാര് കമ്പനിയുടെ 36 വാഹനങ്ങള് മാവോയിസ്റ്റുകള് കത്തിച്ചിരുന്നു. മഹാരാഷ്ട്ര ദിനം ആഘോഷിക്കാനിരിക്കെയാണ് വാഹനങ്ങള് കത്തിച്ചത്. കഴിഞ്ഞ വര്ഷം ഏപ്രില് 22ന് 40 മാവോയിസ്റ്റുകളെ വധിച്ചതിന്റെ വാര്ഷികത്തില് പ്രതികാര നടപടിയുണ്ടാകുമെന്ന് മുന്നറിയിപ്പുണ്ടായിരുന്നു. രാജ്യത്ത് തുടര്ച്ചയായ മൂന്നഴ്ചക്കുള്ളില് നടക്കുന്ന മൂന്നാമത്തെ ആക്രമാണ് ഇത്. മഹാരാഷ്ട്രയില് മാവോയിസ്റ്റ് സ്വാധീന പ്രദേശമാണ് ഗഡ്ചിരോളി.
