ഡല്ഹി: കൊവിഡ് വ്യാപനത്തിന്റെ രണ്ടാംതരംഗത്തില് നടുങ്ങി രാജ്യം. സാഹചര്യം വിലയിരുത്താന് പ്രധാനമന്ത്രി ഇന്ന് ഗവര്ണര്മാരുമായി കൂടിക്കാഴ്ച നടത്താനിരിക്കുകയാണ്. രാജ്യത്ത് ഇതുവരെ റിപ്പോര്ട്ട് ചെയ്യപ്പെട്ടതിലെ ഏറ്റവും വലിയ പ്രതിദിന വര്ദ്ധനയാണ് രേഖപ്പെടുത്തുന്നത്് .24 മണിക്കൂറില് രാജ്യത്ത് റിപ്പോര്ട്ട് ചെയ്യപ്പെട്ടത് 1.84 ലക്ഷം പുതിയ കൊവിഡ് കേസുകളാണ്. പ്രതിദിനമരണം ആയിരം പിന്നിട്ടു. കഴിഞ്ഞ 24 മണിക്കൂറില് കൊവിഡ് ബാധിച്ച് മരിച്ചത് 1027 പേരാണ്. കഴിഞ്ഞ ആറ് മാസത്തിനിടെ റിപ്പോര്ട്ട് ചെയ്യപ്പെട്ടതിലെ ഏറ്റവും വലിയ മരണനിരക്കാണിത്.
രാജ്യത്ത് നിലവില് 13 ലക്ഷത്തിലധികം പേരാണ് കൊവിഡ് ബാധിച്ച് ചികിത്സയില് കഴിയുന്നത്. ലോകത്ത് ഏറ്റവും കൂടുതല് കൊവിഡ് രോഗികളുള്ള രണ്ടാമത്തെ രാജ്യമാണ് ഇന്ത്യ ഇപ്പോള്. ഒന്നാംസ്ഥാനത്ത് അമേരിക്കയാണ്. കൊവിഡ് രോഗികളുടെ എണ്ണത്തിലും വ്യാപനത്തിലും ഇന്ത്യ നിലവില് ബ്രസീലിനെ മറികടന്നു.
കോവിഡ് രാജ്യത്ത് ഏറ്റവും കൂടുതല് ബാധിക്കപ്പെട്ട സംസ്ഥാനമായ മഹാരാഷ്ട്രയില് ഇന്നുമുതല് നിരോധനാജ്ഞ നിലവില് വരുകയാണ്. അറുപതിനായിരം പുതിയ കൊവിഡ് കേസുകളാണ് ഇവിടെ ഇന്നലെ മാത്രം റിപ്പോര്ട്ട് ചെയ്യപ്പെട്ടത്. 281 പേര് ഇന്നലെ മഹാരാഷ്ട്രയില് കൊവിഡ് ബാധിച്ച് മരിച്ചു. അടുത്ത 15 ദിവസത്തേക്ക് കടുത്ത നിയന്ത്രണങ്ങളാണ് മഹാരാഷ്ട്രയില് പ്രഖ്യാപിച്ചിരിക്കുന്നത്.
രാജ്യത്ത് ആകെ കൊവിഡ് കേസുകളുടെ എണ്ണത്തില് കേരളം രണ്ടാം സ്ഥാനത്താണ്. മൂന്നാം സ്ഥാനത്ത് കര്ണാടകയാണ്. തമിഴ്നാടും ആന്ധ്രാപ്രദേശുമാണ് തൊട്ടുപിന്നില്.
