ഡല്ഹി: ഇന്ത്യയും പാകിസ്ഥാനും തമ്മില് ഇന്നു മുതല് അതിര്ത്തിയില് വെടിനിര്ത്തല് ധാരണ. ഇരു രാജ്യത്തിന്റെയും സേനകളാണ് വെടിനിറുത്തലിന് ധാരണയായെന്ന് വ്യക്തമാക്കിയത്. ധാരണകള് പാലിക്കുമെന്ന് ഇരു രാജ്യങ്ങളും സംയുക്ത പ്രസ്താവന ഇറക്കിയിട്ടുണ്ട്.
സേനാ വെടിനിര്ത്തല് ധാരണയെ പിന്തുണച്ച പാക് പ്രധാനമന്ത്രിയുടെ ഓഫീസ്, സൈന്യങ്ങള് തമ്മിലുള്ള ധാരണയാണെന്നാണ് പ്രതികരിച്ചത്. ദേശീയ സുരക്ഷാ ഉപദേഷ്ടാവ് അജിത് ഡോവല് പാക് പ്രധാനമന്ത്രിയുടെ ഓഫീസുമായി ചര്ച്ച നടത്തിയെന്ന റിപ്പോര്ട്ടുകളും പാകിസ്ഥാന് തള്ളി.
എന്നാല് അതേ സമയം ഇന്ത്യ-പാക് അതിര്ത്തിയില് വെടിനിര്ത്തല് ധാരണയായെങ്കിലും സേനാ വിന്യാസം തല്ക്കാലം കുറയ്ക്കില്ലെന്ന് സേന വൃത്തങ്ങള് അറിയിച്ചു. നിയന്ത്രണരേഖയിലെ താമസക്കാരുടെ ദുരിതം കുറയ്ക്കാനാണ് വെടിനിര്ത്തലെന്നും ഭീകരവാദത്തിനെതിരായ നടപടി തുടരുമെന്നും സേന വൃത്തങ്ങള് അറിയിച്ചു.
ഇന്ത്യ-പാകിസ്ഥാന് ധാരണയെ ഐക്യരാഷ്ട്രസഭയും അമേരിക്കയും സ്വാഗതം ചെയ്തു. തെക്കനേഷ്യയിലെ സമാധാനത്തിനും സ്ഥിരതയ്ക്കും സഹായിക്കുമെന്ന് അമേരിക്ക പ്രതികരിച്ചു.
