തിരുവനന്തപുരം: സര്വീസില് തിരിച്ചെടുക്കണമെന്ന കേന്ദ്ര അഡ്മിനിസ്ട്രേറ്റീവ് ട്രൈബ്യൂണലിന്റെ ഉത്തരവില് ഉടന് തീരുമാനമെടുക്കണമെന്നാവശ്യപ്പെട്ട് ഡിജിപി ജേക്കബ് തോമസ് സംസ്ഥാന സര്ക്കാരിന് കത്ത് നല്കി. തിരിച്ചെടുക്കണമെന്ന ഉത്തരവ് സഹിതമാണ് പൊതുഭരണവകുപ്പിനും ചീഫ് സെക്രട്ടറിക്കും കത്ത് നല്കിയിരിക്കുന്നത്. അതേസമയം, ജേക്കബ് തോമസിനെ തിരിച്ചെടുക്കുന്ന വിഷയത്തില് എന്തുനിലപാട് സ്വീകരിക്കണമെന്നതില് സംസ്ഥാന സര്ക്കാര് ഇതുവരെ തീരുമാനമെടുത്തില്ലെന്നാണ് വിവരം. ഉത്തരവിനെതിരെ സംസ്ഥാന സര്ക്കാര് സുപ്രീംകോടതിയെ സമീപിച്ചേക്കുമെന്നും സൂചനയുണ്ട്.
സംസ്ഥാനസര്ക്കാര് മൂന്നുവട്ടം സസ്പെന്ഡ് ചെയ്ത ഡിജിപി ജേക്കബ് തോമസിനെ അടിയന്തരമായി സര്വീസില് തിരിച്ചെടുക്കാന് കേന്ദ്ര അഡ്മിനിസ്ട്രേറ്റീവ് ട്രൈബ്യൂണല് കഴിഞ്ഞദിവസം ഉത്തരവിട്ടിരുന്നു. പൊലീസില് ഒഴിവില്ലെങ്കില് തത്തുല്യമായ തസ്തികയില് നിയമിക്കണമെന്നും ഉത്തരവില് നിര്ദേശമുണ്ട്. തുടര്ച്ചയായ സസ്പെന്ഷന് സര്വീസ് ചട്ടങ്ങള്ക്ക് വിരുദ്ധമാണെന്നും കൃത്യമായ കാരണം ബോധ്യപ്പെടുത്താന് സര്ക്കാരിന് സാധിച്ചിട്ടില്ലെന്നും ട്രൈബ്യൂണല് ചൂണ്ടിക്കാട്ടിയിരുന്നു. വൈരാഗ്യബുദ്ധിയോടെ തന്നെ വേട്ടയാടുകയാണെന്ന ജേക്കബ് തോമസിന്റെ വാദങ്ങള് അംഗീകരിച്ചായിരുന്നു വിധി.
