തിരുവനന്തപുരം: പൗരത്വ നിയമ ഭേദഗതി പ്രതിഷേധ പരിപാടികള്ക്ക് ഒറ്റക്കെട്ടായി നീങ്ങാൻ തീരുമാനം. മുഖ്യമന്ത്രി വിളിച്ചുചേര്ത്ത സര്വകക്ഷി യോഗത്തിലാണ് യോജിച്ച പ്രതിഷേധ പരിപാടികള്ക്ക് രൂപം നല്കാന് തീരുമാനമായത്. ഇതിനായി മുഖ്യമന്ത്രിയേയും പ്രതിപക്ഷ നേതാവിനെയും ചുമതലപ്പെടുത്തി.
പ്രത്യേക നിയമസഭാ സമ്മേളനം വിളിച്ച് പൗരത്വ നിയമ ഭേദഗതിക്കെതിരെ പ്രമേയം പാസാക്കണമെന്നായിരുന്നു യോഗത്തിലെ പ്രധാനപ്പെട്ട ആവശ്യങ്ങളിലൊന്ന്. ഇക്കാര്യത്തില് മുഖ്യമന്ത്രിയും പ്രതിപക്ഷ നേതാവും ബന്ധപ്പെട്ടവരുമായി ആലോചിച്ച് ഉചിതമായ തീരുമാനമെടുക്കും. ബിജെപി ഒഴികെയുള്ള രാഷ്ട്രീയ പാര്ട്ടികളും മത- സാമൂഹ്യ സംഘടനാ നേതാക്കളും യോഗത്തില് പങ്കെടുത്തു.
