തിരുവനന്തപുരം : യൂണിവേഴ്സിറ്റി കോളേജിനകത്ത് വച്ച് തന്നെ കുത്തിയത് ശിവരഞ്ജിത്ത് തന്നെയാണെന്ന് പരിക്കേറ്റ് ചികിത്സയില് കഴിയുന്ന അഖിലിന്റെ നിര്ണ്ണായക മൊഴി. ആശുപത്രിയിലെത്തിയാണ് പൊലീസ് അഖിലിന്റെ മൊഴി രേഖപ്പെടുത്തിയത്. ശിവരഞ്ജിത്തിന് കുത്താനായി നസീം ആണ് തന്നെ പിടിച്ചുവെച്ചതെന്നും അഖില് മൊഴി നല്കിയിട്ടുണ്ട്. ഇക്കാര്യം അഖില് നേരത്തെ തന്നെ അച്ഛനെയും ഡോക്ടര്മാരെയും അറിയിച്ചിരുന്നു. ഇതേ കാര്യങ്ങള് തന്നെയാണ് അഖിലിപ്പോള് പോലീസിനോടും ആവര്ത്തിച്ചിരിക്കുന്നത്. സംഭവ സമയം വലിയൊരു ആള്ക്കൂട്ടം അവിടെ ഉണ്ടായിരുന്നുവെന്നും അഖില് പറയുന്നു.
ദൃക്സാക്ഷികളുടെ മൊഴികളുടെ അടിസ്ഥാനത്തിലായിരുന്നു ഇതുവരെ അന്വേഷണം പുരോഗമിച്ചിരുന്നത്. മുന് വൈരാഗ്യമാണ് ശിവരഞ്ജിത്തിനെ പ്രകോപിപ്പിച്ചതെന്ന് അഖിലില് നിന്നും മൊഴിയെടുത്ത ശേഷം പോലീസ് പറഞ്ഞു. എസ്എഫ്ഐയുടെ ധിക്കാരം അംഗീകരിക്കാത്തിലുള്ള വിരോധമാണെന്നും അഖില് പോലീസിനോട് പറഞ്ഞു. വധശ്രമത്തിനിടെ പരിക്കേറ്റ് ചികിത്സയില് കഴിയുന്ന അഖില് എല്ലാ കാര്യങ്ങളിലും വളരെ വ്യക്തമായ മൊഴിയാണ് നല്കിയിട്ടുള്ളതെന്നും ഇതനുസരിച്ച് കേസില് തുടര് നടപടികള് ഉണ്ടാകുമെന്നും പൊലീസ് അറിയിച്ചു.
അഖിലിനെ ആക്രമിക്കാന് ഉപയോഗിച്ച ആയുധം കണ്ടെത്തുകയാണ് അടുത്ത ലക്ഷ്യം. നിലവില് മൂന്ന് ദിവസത്തെ കസ്റ്റഡി അനുവദിച്ചിട്ടുണ്ട്. അതിനുള്ളില് ഇവരെ ഒളിവില് പോകാന് സഹായിച്ചവരെ കുറിച്ചും ഒളിയിടവും കണ്ടെത്തണം. ഒപ്പം കോളജില് എത്തിച്ചും തെളിവെടുപ്പ് നടത്തും. അന്വേഷണത്തിന്റെ ഭാഗമായി പ്രതികളുടെ ഫോണ് രേഖകളും പരിശോധിക്കേണ്ടി വരും.
