കായംകുളം: സ്‌റ്റേറ്റ്‌ ബാങ്ക്‌ ഒഫ്‌ ഇന്ത്യയുടെ ഓച്ചിറയിലെ എ.ടി.എമ്മില്‍ കവര്‍ച്ചാശ്രമം. ചൊവ്വാഴ്ച രാത്രി ഒന്‍പതു മണിയോടെ മെഷീനില്‍ പണം നിറയ്‌ക്കാന്‍ കരാറെടുത്ത സ്വകാര്യ ഏജന്‍സി ജീവനക്കാരാണ്‌ മോഷണശ്രമം ആദ്യം അറിഞ്ഞത്‌. എ.ടി.എമ്മിന്റെ അടിഭാഗം പൊളിക്കാന്‍ ശ്രമിച്ച നിലയിലാണ്‌ കാണപ്പെട്ടത്. ഇവര്‍ ഓച്ചിറ പോലീസില്‍ വിവരം അറിയിച്ചു. തുടര്‍ന്ന്‍ പോലീസ്‌ നടത്തിയ പരിശോധനയില്‍ മോഷണശ്രമമാണെന്ന്‌ സ്‌ഥിരീകരിച്ചു.
പണം നഷ്‌ടപ്പെട്ടിട്ടില്ലെന്ന്‌ എസ്.ബി.ഐ അധികൃതര്‍ അറിയിച്ചു. എ.ടി.എമ്മിലെയും സമീപ പ്രദേശങ്ങളിലെയും സി.സി ടി.വി ക്യാമറകള്‍ പരിശോധിച്ചു തുടങ്ങിയതായി പോലീസ്‌ പറഞ്ഞു. ഇന്നലെ വൈകിട്ട്‌ 3.30 ഓടെ ബാങ്ക്‌ അധികൃതര്‍ എ.ടി.എമ്മില്‍ വിശദമായി പരിശോധന നടത്തി. സംഭവം ആലപ്പുഴ ജില്ലയിലായതിനാല്‍ കേസ്‌ കായംകുളം പോലീസിന്‌ കൈമാറി. കായംകുളം സി.ഐ: കെ.സദന്റെ നേതൃത്വത്തിലുള്ള സംഘം അന്വേഷണം ആരംഭിച്ചു.
