പമ്പ : ശബരിമലയില് വന് ഭക്തജന തിരക്ക് കൂടിയ സാഹചര്യത്തില് പമ്ബയില് നിയന്ത്രണം ഏര്പ്പെടുത്തി. ഗണപതി ക്ഷേത്രത്തിന് സമീപം ബാരിക്കേഡുകള് വച്ച് ഭക്തരെ നിയന്ത്രിക്കുകയാണ്. മണ്ഡല പൂജ അവസാനിക്കാന് രണ്ട് ദിവസം മാത്രമാണ് ഉള്ളതെന്നതും സ്കൂള് അവധിയായതും തിരക്ക് കൂടാന് കാരണമായിട്ടുണ്ട്. അഞ്ച് മണിക്കൂറിലേറെയാണ് ഭക്തര് കുടുങ്ങി കിടക്കുന്നത്.
അതേ സമയം തിരക്ക് കാരണം മണിക്കൂറുകളാണ് എരുമേലി നിലയ്ക്കല് റൂട്ടില് അയ്യപ്പ ഭക്തര് സഞ്ചരിക്കുന്ന വാഹനങ്ങള് കുടുങ്ങി കിടക്കുന്നത്. 17 പാര്ക്കിങ് ഗ്രൗണ്ടുകളാണ് നിലയ്ക്കലില് ഇപ്പോള് ഉള്ളത്. ഇവിടെല്ലാമായി 15000 വാഹനങ്ങള് പാര്ക്ക് ചെയ്യാമെന്നാണ് കണക്ക്. എന്നാല് നിലവില് 8000 വാഹനങ്ങള് മാത്രമേ പാര്ക്ക് ചെയ്യാന് കഴിയുകയുള്ളൂ. പകല് നിലയ്ക്കലില് വാഹനം പാര്ക്ക് ചെയ്ത് സന്നിധാനത്തേക്ക് പോകുന്ന തീര്ത്ഥാടകാര് തിരിച്ചെത്താന് വൈകുന്നതും പാര്ക്കിങ്ങിലെ അപര്യാപ്തതയുമാണ് ഗതാഗതക്കുരുക്ക് രൂക്ഷമാക്കുന്നത്.
