പത്തനംതിട്ട: ജസ്നയുടെ തിരോധാനം വഴിത്തിരിവിലേക്ക്. കാണാതായ പെണ്കുട്ടി ജസ്നയ്ക്കായുള്ള തിരിച്ചില് ഊര്ജ്ജിതമായി തുടരുന്നതിനിടയില് പിതാവ് നിര്മ്മിക്കുന്ന വീടിന്റെ തറ പൊളിച്ച് പരിശോധിക്കണമെന്ന് അന്വേഷണ സംഘത്തിന് അയര്ലന്റില് നിന്നും ഒരു ഫോണ് കോള്. ഈ വിവരം വെച്ച് ഏന്തയാറിലുള്ള കെട്ടിടം മെറ്റല് ഡിക്റ്ററ്റര് ഉപയോഗിച്ച് പരിശോധിക്കാനുള്ള നീക്കത്തിലാണ് പോലീസ്. അതേസമയം ജസ്നയുടെ ആണ്സുഹൃത്തിനേയും വിശദമായ ചോദ്യം ചെയ്യലിന് പോലീസ് വിധേയമാക്കി. ആയിരത്തോളം തവണ ജസ്നയെ വിളിച്ചതായി കണ്ടെത്തി.
ഈ യുവാവിന് തന്നെയാണ് മരിക്കാന് പോകുന്നുവെന്ന് സൂചിപ്പിച്ച് ജസ്ന എസ്എംഎസ് അയച്ചത്.യുവാവിനെ പറ്റി കൂടുതല് അന്വേഷണം തുടങ്ങിയിട്ടുണ്ട്. ആണ് സുഹൃത്തിനേയും പിതാവിനേയും ഇതിനോടകം പതിനഞ്ച് തവണ പോലീസ് ചോദ്യം ചെയ്തു. ആണ്സുഹൃത്ത് അന്വേഷണത്തോട് സഹകരിക്കുന്നില്ലെന്നാണ് പോലീസ് വ്യക്തമാക്കുന്നത്. കേരളത്തിലും പുറത്തും സാധ്യതയുള്ള എല്ലായിടവും അരിച്ചു പെറുക്കിയിട്ടും കണ്ടെത്താന് കഴിയാത്ത സാഹചര്യത്തില് ജസ്നയെ ആരെങ്കിലും അപായപ്പെടുത്തിയോ എന്ന സംശയവും പോലീസിനുണ്ട്.
ഈ സംശയത്തില് അജ്ഞാത മൃതദേഹം പരിശോധന നടത്താനുള്ള ആലോചനയിലാണ് പോലീസ്. ഇതുവരെ മൂന്ന് മൃതദേഹങ്ങളാണ് അന്വേഷണ സംഘം പരിശോധിച്ചത്. മറ്റ് സംസ്ഥാനങ്ങളിലേക്കും തിരച്ചില് വ്യാപിപ്പിക്കും. തമിഴ്നാട്, കര്ണാടക, ഗോവ എന്നിവിടങ്ങളില് കണ്ടെത്തിയ മൃതദേഹങ്ങള് കേന്ദ്രീകരിച്ചാണ് ഇപ്പോള് പരിശോധന നടത്തുന്നത്. ബെംഗളൂരു, ഗോവ, ചെന്നൈ എന്നിവിടങ്ങളില് എല്ലാം പോലീസ് പരിശോധന നടത്തിയെങ്കിലും നിരാശയായിരുന്നു ഫലം.
