മുംബൈ: രണ്ടു ഡോസ് കോവിഷീല്ഡ് വാക്സിന് സ്വീകരിച്ച എംബിബിഎസ് വിദ്യാര്ഥിയ്ക്ക് കോവിഡ്. മുംബൈയിലെ സിയോണ് ആശുപത്രിയിലെ എംബിബിഎസ് വിദ്യര്ത്ഥിയ്ക്കാണ് രോഗബാധ. വിദ്യാര്ത്ഥി കഴിഞ്ഞാഴ്ചയായിരുന്നു വാക്സിന്റെ രണ്ടാമത്തെ ഡോസ് സ്വീകരിച്ചത്. കോവിഡ് ലക്ഷണങ്ങള് പ്രകടിപ്പിച്ചതോടെ പരിശോധനയ്ക്ക് വിധേയനാക്കുകയായിരുന്നു.
ശനിയാഴ്ച രാത്രിയോടെ വിദ്യാര്ത്ഥിയെ സെവന് ഹില്സ് ആശുപത്രിയില് പ്രവേശിപ്പിച്ചു. എന്നാല് രണ്ട് ഡോസ് വാക്സിന് സ്വീകരിച്ച ശേഷവും പ്രതിരോധ ശേഷി കൈവരിക്കാന് ദിവസങ്ങളോളം എടുക്കുമെന്നാണ് ഡോക്ടര്മാരുടെ വാദം. വാക്സിന് സ്വീകരിക്കുന്ന എല്ലാവരും നിശ്ചിത സമയപരിധിക്കുള്ളില് രോഗപ്രതിരോധ ശേഷി കൈവരിക്കില്ലെന്ന് സെവന് ഹില്സ് ആശുപത്രിയിലെ ഡോക്ടര് ബാല്കൃഷ്ണ അദ്സുല് പറഞ്ഞു. വാക്സിന് സ്വീകരിച്ചു കഴിഞ്ഞാല് പൂര്ണ്ണമായും രോഗപ്രതിരോധ ശേഷി കൈവരിക്കാന് 45 ദിവസം വരെ എടുക്കുമെന്നും അദേഹം കൂട്ടിച്ചേര്ത്തു.
വിദ്യാര്ത്ഥിക്ക് നേരിയ രോഗലക്ഷണങ്ങളുണ്ടെങ്കിലും പേടിക്കേണ്ട സാഹചര്യമില്ലെന്നും ഡോക്ടര്മാര് വ്യക്തമാക്കി. അതേസമയം കോവിഡ് വാക്സിന് സ്വീകരിച്ച ശേഷം ചില ആരോഗ്യപ്രവര്ത്തകര്ക്കും രോഗം സ്ഥിരീകരിച്ചിരുന്നു. പ്രതിരോധശേഷി കൈവരിക്കുന്നതിനു മുന്പു തന്നെ അവര് രോഗബാധിതരായതിനാലാണെന്ന് ആശുപത്രി ഡീന് ഡോക്ടര് മോഹന് ജോഷി പറഞ്ഞു.
