തിരുവനന്തപുരം:
ഇന്ന് തിരുവനന്തപുരം ജില്ലയിൽ 2 പേർ, കൊല്ലം പാലക്കാട്, മലപ്പുറം കാസർകോട് എന്നീ ജില്ലകളിൽ ഓരോരുത്തർക്കും ആണ് കോവിഡ് 19 സ്ഥിരീകരിച്ചത്. ഇതോടെ സംസ്ഥാനത്ത് ആകെ ചികിത്സയിലുള്ളവരുടെ എണ്ണം 165 ആയി. 1,34, 731 പേർ വീടുകളിലും 650 പേർ ആശുപത്രികളിലും നിരീക്ഷണത്തിലാണ്. ഇന്നത്തെ ദിവസം മാത്രം 148 പേരെ ആശുപത്രിയിൽ പ്രവേശിപ്പിച്ചത്. ഇന്ന് പരിശോധിച്ച സാമ്പിളുകളിൽ 5267 പേർക്ക് രോഗബാധയില്ല എന്ന് ഉറപ്പായതായും മുഖ്യമന്ത്രി അറിയിച്ചു.
ദുഃഖകരമായ വാർത്തയാണ് പറയാനുള്ളത് എന്ന് പറഞ്ഞായിരുന്നു മുഖ്യമന്ത്രി പത്രസമ്മേളനം തുടങ്ങിയത്. എറണാകുളം ചുള്ളിക്കൽ സ്വദേശിയായ 69 കാരനാണ് മരണമടഞ്ഞത്. ദുബൈയിൽനിന്നാണ് അദ്ദേഹം എത്തിയത്. മാർച്ച് 22 ന് കടുത്ത ന്യൂമോണിയ ലക്ഷണങ്ങളോടെയാണ് കൊവിഡ് ചികിത്സാ കേന്ദ്രത്തിൽ പ്രവേശിപ്പിച്ചത്. ഹൃദ്രോഗിയും ബൈപാസ് ശസ്ത്രക്രിയക്ക് വിധേയനുമായിരുന്നു. രക്തസമ്മർദ്ദവും ഉണ്ടായിരുന്നു. ഇത്തരത്തിൽ വിവിധ രോഗങ്ങൾ ഉള്ളതുകൊണ്ടാണ് ചികിത്സിക്കാനുള്ള അവസാനശ്രമവും വിജയിക്കാതെ പോയതെന്ന് മുഖ്യമന്ത്രി വിശദീകരിച്ചു.
