ന്യൂഡല്‍ഹി: സി.ബി.ഐ കേസ് പരിഗണിക്കുന്നതില്‍ നിന്ന് സുപ്രീം കോടതി ചീഫ് ജസ്റ്റിസ് രഞ്ജന്‍ ഗൊഗോയ് പിന്മാറി. സി.ബി.ഐ താല്കാലിക ഡയറക്ടര്‍ നാഗേശ്വര റാവുവിന്റെ നിയമനത്തിനെതിരെ ഹര്‍ജി കേള്‍ക്കുന്നതില്‍ നിന്നാണ് അദ്ദേഹം പിന്മാറിയത്.
എന്നാല്‍ ഈ മാസം 24ന് സി.ബി.ഐ ഡയറക്ടറുടെ നിയമനത്തിനായി നടത്തുന്ന സെലക്ഷന്‍ കമ്മറ്റിയില്‍ ചീഫ് ജസ്റ്റ‌ി‌സും പങ്കെടുക്കുന്നുണ്ട്. അതുകൊണ്ടാണ് നാഗേശ്വര റാവുവിന്റെ നിയമനവുമായി ബന്ധപ്പെട്ട കേസ് പരിഗണിക്കാനാവില്ലെന്ന കാര്യം ചീഫ് ജസ്റ്റിസ് വ്യക്തമാക്കിയത്. നേരത്തേ അലോക് വര്‍മ്മ നല്‍കിയ ഹര്‍ജി പരിഗണിച്ച സാഹചര്യം ചൂണ്ടിക്കാട്ടി സെലക്ഷന്‍ സമിതിയില്‍ ചീഫ് ജസ്റ്റിസ് രഞ്ജന്‍ ഗൊഗോയ് പങ്കെടുക്കാതെ പകരം എ.കെ സിക്രിയെ സമിതിയിലേക്ക് അയച്ചിരുന്നു.
പുതിയ മേധാവിയെ തിരഞ്ഞെടുക്കുന്ന സെലക്ഷന്‍ കമ്മറ്റിയില്‍ ചീഫ് ജസ്റ്റിസ് അംഗമായതിനാലാണ് ഹര്‍ജി പരിഗണിക്കുന്നതില്‍ നിന്ന് പിന്മാറുന്നതെന്ന് അദ്ദേഹം പറഞ്ഞു. ജസ്റ്റിസ് എ.കെ സിക്രി അധ്യക്ഷനായ രണ്ടാം നമ്ബര്‍ കോടതിയില്‍ ഹര്‍ജി പരിഗണിക്കുമെന്ന് ചീഫ് ജസ്റ്റിസ് രഞ്ജന്‍ ഗൊഗോയ് അറിയിച്ചു.
ചട്ടങ്ങള്‍ പാലിക്കാതെയാണ് നാഗേശ്വര റാവുവിനെ നിയമിച്ചതെന്ന് ചൂണ്ടിക്കാട്ടി പ്രശാന്ത് ഭൂഷണാണ് ഹര്‍ജി സമര്‍പ്പിച്ചത്. നാഗേശ്വര റാവുവിനെ മാറ്റി സ്ഥിരം ഡയറക്ടറെ നിയമിക്കണം എന്നാണ് പ്രശാന്ത് ഭൂഷണിന്റെ നല്‍കിയ ഹര്‍ജിയിലെ പ്രധാന ആവശ്യം.
