കോട്ടയം : ജലന്ധര് ബിഷപ്പിനെതിരായ പരാതിയില് കര്ദിനാള് മാര് ജോര്ജ് ആലഞ്ചേരിയുടെ മൊഴിയെടുക്കും. പീഡന വിവരം കര്ദിനാള് ആലഞ്ചേരിയെ നേരത്തെ അറിയിച്ചിരുന്നു. എന്നാല് നടപടികളൊന്നും ഉണ്ടായില്ലെന്ന് കന്യാസ്ത്രീ പറഞ്ഞിരുന്നു. ഇതിന്റെ അടിസ്ഥാനത്തിലാകും മൊഴിയെടുക്കല്. പരാതി അറിയിച്ചിട്ടും കേസില് ഇടപെടാതെ ഒഴിഞ്ഞ് മാറാനാണ് കര്ദിനാള് ആലഞ്ചേരി ശ്രമിച്ചതെന്ന് കന്യാസ്ത്രീയുടെ ബന്ധുവായ ജലന്ധര് വൈദികന് ആരോപിച്ചിരുന്നു. സംഭവം മാര്പ്പാപ്പയെ അറിയിക്കാനുള്ള ബാധ്യത ആലഞ്ചേരിക്ക് ഉണ്ടായിരുന്നുന്നെന്നും വൈദികന് പറഞ്ഞു.
പാലാ ബിഷപ്പ്, കുറവിലങ്ങാട് പള്ളി വികാരി എന്നിവരുടെയും മൊഴിയെടുക്കും. കര്ദിനാളിന് നല്കിയ പരാതിയുടെ പകര്പ്പ് പൊലീസിന് കൈമാറിയിട്ടുണ്ട്. കര്ദിനാളിനെ കാണാന് പോയ സമയത്ത് 15 മിനുട്ട് മറ്റ് കന്യാസ്ത്രീകളെ ഒഴിവാക്കി കര്ദിനാള് ആലഞ്ചേരിയുമായി പീഡനത്തിനിരയായ കന്യാസ്ത്രീ സംസാരിച്ചത് എന്താണെന്ന് വെളിപ്പെടുത്തണം. പരാതിയുടെ ഗൗരവം സഭ ഇതുവരെ പരിഗണിച്ചില്ലെന്നും സഭാ അധ്യക്ഷമാര് ആരോപണ വിധേയനായ ബിഷപ്പിനെ പിന്തുണയ്ക്കുന്നെന്നും വൈദികന് ആരോപിച്ചു.
