തിരുവനന്തപുരം: സംസ്ഥാനത്ത് കനത്തമഴയും കാറ്റും തുടരവേ നാലു വയസുകാരി ഉള്‍പ്പെടെ ഏഴു മരണം. മഴ ശക്തമായതിനെ തുടര്‍ന്ന് തീരപ്രദേശത്ത് കടലാക്രമണവും രൂക്ഷമാണ്. തിരുവനന്തപുരം നഗരത്തില്‍ മാത്രം നാല്‍പത്തിയഞ്ചിടത്ത് മരം കടപുഴകി. ദേശീയപാതയിലുള്‍പ്പെടെ പ്രധാന റോഡുകളില്‍ഗതാഗതം തടസ്സപ്പെട്ടു. പതിമൂന്നാം തീയതിവരെ ശക്തമായ മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
തിരുവനന്തപുരം, കോഴിക്കോട്, ആലപ്പുഴ, കാസര്‍കോട് ജില്ലകളിലാണ് മരണങ്ങള്‍ റിപ്പോര്‍ട്ട് ചെയ്തത്. കോഴിക്കോട് എല്ലാ താലൂക്കിലും കണ്‍ട്രോള്‍ റൂം തുറന്നു. നാദാപുരം, കുറ്റ്യാടി, വടകര മേഖലയില്‍ മാത്രം നാല്പതിലധികം വീടുകള്‍ തകര്‍ന്നു. ഇടുക്കിയിലും ശക്തമായ മഴതുടരുകയാണ്. കല്ലാര്‍കുട്ടി ഡാമിന്റെ മൂന്ന് ഷട്ടറുകള്‍ തുറന്നു. പ്രദേശവാസികള്‍ ജാഗ്രത പാലിക്കണമെന്ന് മുന്നറിയിപ്പുണ്ട്. ഇടുക്കിയില്‍വ്യാപകമായ കൃഷിനാശവുമുണ്ടായി.
