ന്യൂഡല്ഹി: ലോക്സഭാ തെരഞ്ഞെടുപ്പില് മത്സരിക്കാനില്ലെന്ന് പ്രിയങ്ക ഗാന്ധി. ലഖ്നൗവില് പാര്ട്ടി പ്രവര്ത്തകരോടാണ് പ്രിയങ്ക ഇക്കാര്യം പറഞ്ഞത്. പാര്ട്ടിയെ ശക്തിപ്പെടുത്തുന്നതിലും പ്രചാരണത്തിലുമായിരിക്കും തന്റെ ശ്രദ്ധയെന്നും പ്രിയങ്ക വ്യക്തമാക്കി.
എഐസിസി ജനറല് സെക്രട്ടറിയായി പ്രിയങ്ക ഗാന്ധിയെ നിയമിച്ചിരുന്നു. ഇതിനു ശേഷം പ്രിയങ്ക തെരഞ്ഞെടുപ്പില് മത്സരിക്കുമെന്ന തരത്തില് സൂചനകള് എത്തിയിരുന്നു.
കഴിഞ്ഞ ദിവസം യുപിയില് പാര്ട്ടി പ്രവര്ത്തകരുമായി പ്രിയങ്ക ഗാന്ധി 16 മണിക്കൂര് നീണ്ട ചര്ച്ച നടത്തിയിരുന്നു. ചൊവ്വാഴ്ച ഉച്ചയ്ക്ക് തുടങ്ങിയ ചര്ച്ച ബുധനാഴ്ച അതിരാവിലെ വരെ നീണ്ടു നിന്നിരുന്നു. താന് ലക്ഷ്യമിടുന്നത് തെരഞ്ഞെടുപ്പിനെ എങ്ങനെ നേരിടണമെന്നാണെന്നും ഫലം കോണ്ഗ്രസിന് അനുകൂലമാക്കുന്നതിനെ കുറിച്ചും പ്രവര്ത്തകരില് നിന്നും ആശയം തേടുകയായിരുന്നുവെന്ന് പ്രിയങ്ക അറിയിച്ചിരുന്നു.
