കൊച്ചി: ആലുവ എടയാറിലെ സ്വര്ണ ശുദ്ധീകരണശാലയിലേക്ക് കൊണ്ടുവന്ന സ്വര്ണം കവര്ന്ന കേസിലെ മുഴുവന് പ്രതികളും പിടിയില്. നാല് പേരെ വെള്ളിയാഴ്ച മൂന്നാറിലെ വനത്തില് നിന്നും പിടികൂടിയതോടെയാണ് മുഴുവന് പ്രതികളും പിടിയിലായത്. ഇതോടെ അഞ്ചുപേരാണ് പിടിയിലായിരിക്കുന്നത്. കവര്ച്ച ആസൂത്രണം ചെയ്തത് സ്വര്ണ്ണം ശുദ്ധീകരണശാലയിലെ മുന് ഡ്രൈവര് സതീഷാണ്. കഴിഞ്ഞയാഴ്ചയാണ് കൊച്ചിയിലെ സ്വര്ണ്ണ ശുദ്ധീകരണശാലയിലേക്ക് കൊണ്ടുവന്ന മാര്ക്കറ്റില് ആറ് കോടിയോളം രൂപ മൂല്യം വരുന്ന 21 കിലോ സ്വര്ണ്ണം കവര്ന്നത്.
വധശ്രമം അടക്കമുള്ള കേസുകളിലെ പ്രതിയാണ് ഇയാളെന്ന് പൊലീസ് പറയുന്നു. എയര്ഗണ് അടക്കമുള്ള ആയുധങ്ങളുമായാണ് പ്രതികള് മൂന്നാറിലെ കാട്ടില് ഒളിവില് കഴിയുകയായിരുന്നെന്ന് അന്വേഷണ ഉദ്യോഗസ്ഥര് പറയുന്നു. ഏറ്റുമുട്ടലിന് ശേഷമാണ് ഇവരെ കീഴടക്കാന് കഴിഞ്ഞത്. ഏറ്റുമുട്ടലില് രണ്ട് പ്രതികള്ക്ക് പരിക്കേറ്റിട്ടുണ്ട്. കവര്ച്ചയിലൂടെ കിട്ടിയ സ്വര്ണം ഭദ്രമായി ഒളിപ്പിച്ച ശേഷമാണ് മൂവരും ഒളിവില് പോയത്.
മെയ് പത്തിന് പുലര്ച്ചെയാണ് ആലുവ എടയാറിലെ സ്വര്ണ ശുദ്ധീകരണശാലയിലേക്ക് കൊണ്ടുവന്ന സ്വര്ണം വാഹനം ആക്രമിച്ച് കൊള്ളയടിച്ചത്. മോഷണം നടന്ന ദിവസം രാത്രി സ്വര്ണ ശുദ്ധീകരണ ശാലയ്ക്ക് സമീപം കവര്ച്ചാ സംഘം എത്തിയിരുന്നതായി അന്വേഷണ സംഘത്തിന് വിവരം ലഭിച്ചിരുന്നു. സംശയം തോന്നിയ പ്രദേശവാസികളില് ചിലര് കാര്യം തിരക്കിയെങ്കിലും ഫാക്ടറിയിലെ ഒരു ജീവനക്കാരനെ കാണാന് വന്നതെന്നായിരുന്നു മറുപടി.
