ന്യൂഡല്ഹി: വോട്ടെണ്ണുമ്പോള് വിവിപാറ്റ് രസീതുകള് ആദ്യം എണ്ണണമെന്ന പ്രതിപക്ഷത്തിന്റെ ആവശ്യം തിരഞ്ഞെടുപ്പ് കമ്മീഷന് തള്ളി. ആദ്യം വിവിപാറ്റ് രസീതുകള് എണ്ണണമെന്നും അതു വോട്ടുകളുമായി ഒത്തുപോയില്ലെങ്കില് ആ മണ്ഡലത്തിലെ എല്ലാ വിവിപാറ്റുകളും എണ്ണി വോട്ടുകളുമായി ഒത്തുനോക്കണമെന്നുമായിരുന്നു പ്രതിപക്ഷത്തിന്റെ ആവശ്യം. ഇത് പ്രായോഗികമല്ലെന്നും, ആദ്യം വിവിപാറ്റുകള് എണ്ണിയാല് ഫലപ്രഖ്യാപനം വൈകുമെന്നുമാണ് തെരഞ്ഞെടുപ്പ് കമ്മീഷന് വ്യക്തമാക്കുന്നത്.
വോട്ടിങ് യന്ത്രത്തില് രേഖപ്പെടുത്തിയിരിക്കുന്ന വോട്ടുകള് എണ്ണും. അതിന് ശേഷംമാത്രമേ അഞ്ച് പോളിങ്ങ് സ്റ്റേഷനുകളിലെ വിവിപാറ്റ് രസീതുകള് എണ്ണുകയുള്ളുവെന്ന് ഇലക്ഷന് കമ്മീഷന് വ്യക്തമാക്കി.
കഴിഞ്ഞ ദിവസമാണ് വിവിപാറ്റ് മെഷിനുകളെക്കുറിച്ചുള്ള ആശങ്ക പ്രതിപക്ഷ കക്ഷികള് തിരഞ്ഞെടുപ്പ് കമ്മീഷനെ സന്ദര്ശിച്ച് അറിയിച്ചത്. 50 ശതമാനം വിവിപാറ്റ് രസീതുകളും എണ്ണുമെന്നും ഒത്തുനോക്കുമ്പോള് പൊരുത്തക്കേട് കണ്ടെത്തിയാല് മുഴുവന് രസീതുകളും ഒത്തുനോക്കണമെന്നും കമ്മീഷനോട് പ്രതിപക്ഷ കക്ഷികള് ആവശ്യപ്പെട്ടിരുന്നു.
യുപിയിലും ബിഹാറിലും ഹരിയാനയിലും പഞ്ചാബിലും ഇവിഎമ്മുകള് സുരക്ഷയില്ലാതെ കൊണ്ടുപോകുന്ന ദൃശ്യങ്ങള് അടിസ്ഥാനരഹിതമെന്ന് നേരത്തേ തെരഞ്ഞെടുപ്പ് കമ്മീഷന് വ്യക്തമാക്കിയിരുന്നു. യുപിയിലെ ചന്ദൗലിയില് സമാജ്വാദി പ്രവര്ത്തകര് നേരിട്ട് പകര്ത്തിയ ദൃശ്യങ്ങളടക്കം പുറത്തുവന്നത് വലിയ വിവാദമായ പശ്ചാത്തലത്തിലാണ് തെരഞ്ഞെടുപ്പ് കമ്മീഷന്റെ പ്രതികരണം. വോട്ടെണ്ണലിന് ഇനി ഒരു ദിവസം മാത്രം ശേഷിക്കേയാണ് ഉത്തരേന്ത്യന് സംസ്ഥാനങ്ങളില് പലയിടത്തും ഒരു സുരക്ഷയുമില്ലാതെ ലോറികളില് കയറ്റിക്കൊണ്ടുവരുന്ന ഇവിഎമ്മുകള് ദൃശ്യങ്ങള് സാമൂഹ്യമാധ്യമങ്ങളില് പ്രചരിക്കുന്നത്.
